«Դենտեքս Դենտալ Գրուպ» ատամնաբուժական կլինիկան նեյեմբերի 26-ից սկսել է բարեգործական նոր ծրագիր:
«Դենտեքս Դենտալ Գրուպ» ատամնաբուժական կլինիկան իրականացնում է բարեգործական նոր ծրագիր
ՍՏԵՓԱՆԱԿԵՐՏ, 23 դեկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «Դենտեքս Դենտալ Գրուպ» ատամնաբուժական կլինիկայի գլխավոր բժիշկ Աիդա Հարությունյանը:
Նրա խոսքով՝ ծրագրի շրջանակներում, հանրապետության սահմանամերձ բնակավայրերում ապրող քաղաքացիներին հնարավորություն է տրվում օգտվելու բժշկական անվճար ծառայություններից:
«ԱՄՆ Ֆիլադելֆիա քաղաքի «Դենտեքս Դենտալ Գրուպ» կլինիկայի Ստեփանակերտի մասնաճյուղի հիմնադիր, արմատներով արցախցի Ալբերտ Ալոյանի մտահղացմամբ է իրականացվում բարեգործական այս նոր ծրագիրը: Ատամնաբուժարանի բժիշկներն իրենց աշխատանքը սկսել են Մարտակերտի շրջանի Թալիշ համայնքից: Բուժսպասարկումն իրականացվել է անհրաժեշտ պարագաներով կահավորված «Դենտեքս» ստոմոտոլոգիական շարժական մեքենայում: Թալիշում ընդունելության թիվը հասել է 180-ի, այդ թվում՝ իրականացվել է 17 քաղաքացու ատամների պրոթեզավորում: Այնուհետև պրոֆիլակտիկ աշխատանքներ են իրականացվել նաև Մատաղիսի դպրոցում, որտեղ սովորում է 106 աշակերտ»,- մանրամասնել է Ա. Հարությունյանը և տեղեկացրել, որ մինչև տարվա վերջ բարեգործական այս ծրագիրը կշարունակեն նաև Հադրութի շրջանի սահմանամերձ գյուղերում:
Մեր զրուցակիցը նշել է նաև, որ «Դենտեքս Դենտալ Գրուպ» ատամնաբուժական կլինիկան 2016 թվականից սկսած իրականցնում է նաև «Զինվոր» բարեգործական ծրագիրը, որի շրջանակներում սահմանապահ զինծառայողներին ցուցաբերվում է անվճար բուժօգնություն:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -27-:
