Լեգենդար երգիչ Շառլ Ազնավուրին եւ Ցեղասպանությունը վերապրած Ավրորա Մարդիգանյանին նվիրված մանկական կոմիքս գրքեր են ստեղծվել:
Շառլ Ազնավուրին և Ավրորա Մարդիգանյանին նվիրված կոմիքս գրքեր են ստեղծվել
ՍՏԵՓԱՆԱԿԵՐՏ, 7 դեկտեմբերի, ԱՐՑԱԽՊՐԵՍ։ «Շառլ» եւ «Ավրորա» գրքերի շնորհանդեսը տեղի կունենա դեկտեմբերի 8-ին, ժամը 17:00 Գրանդ հոթել Երեւան հյուրանոցում:
«Շառլ» փոքրիկ գիրքը պատմում է ֆրանսահայ անվանի արտիստ Շառլ Ազնավուրի մասին։ Այս գրքի գաղափարը ծնվեց դեռ նախորդ տարի, երբ Նիկոլա եւ Քրիստինա Ազնավուրները Դիլիջանի ձմեռային տոնավաճառում ծանոթացան «Իմ փոքրիկ գիրքը» շարքի առաջին գրքերին։ Հանդիպումից ու նրանց արձագանքից ոգեշնչված՝ մեր թիմը շուրջ մեկ տարի աշխատեց այս գրքի վրա եւ՝ համագործակցելով «Ազնավուր» հիմնադրամի հետ, ունեցավ ցանկալի արդյունք։
Գրքում պատկերված են դրվագներ երգչի մանկությունից. այն մասին, թե ինչպես նա ընդունվեց մանկապատանեկան թատրոն, ինչպես նաեւ տեսարաններ ֆիլմերի նկարահանումներից եւ Էդիթ Պիաֆի հետ հանդիպումը, որը շրջադարձային եղավ Ազնավուրի կյանքում։ Փոքրիկ ընթերցողը կճանաչի Շառլին որպես փոքրիկ տղա, որը կարողացավ հաղթահարել բազում դժվարություններ ու դարձավ հանրահայտ արտիստ եւ մեծ բարերար։
«Ավրորա» փոքրիկ գիրքն էլ ցեղասպանությունը վերապրած Արշալույս Մարդիգանյանի մասին է, ում վիճակված էր դառնալ Հոլիվուդյան համր կինոյի առաջին հայազգի կինոաստղը։ Ավրորայի ճակատագիրը հեշտ չէր, ու գրքի հեղինակներն էլ չեն խուսափում փոքրիկ ընթերցողիհ հետ՝ մատչելի լեզվով, խոսել կորուստի ու դժվարությունների մասին։ Փոքրիկ ընթերցողին գրքի հերոսները կոգեշնչեն հենց այդ դժվարությունները հաղթահարելու իրենց խիզախությամբ ու անկոտրում կամքով։
Նշենք, որ 2018-ի դեկտեմբերին հայաստանյան կոմիքս արտադրող «Էյջ Ուայ փիքչըրս» ընկերությունը ներկայացավ ամենափոքրիկ ընթերցողների համար նախատեսված կոմիքս գրքերի նոր շարքով։ «Իմ փոքրիկ գիրքը» շարքը նախատեսված է 3+ տարիքի ընթերցողների համար։ Գունագեղ պատկերապատումների միջոցով փոքրիկ ընթերցողները ճանաչում են հայ մեծերին։ Առաջին երկու փոքրիկ գրքերն էին «Լուսինեն» եւ «Վիկտորը», որոնք պատմում էին հայ հոգեւոր երգի ամենահայտնի երգչուհու՝ Լուսինե Զաքարյանի, եւ աստղագետ, աստղաֆիզիկոս Վիկտոր Համբարձումյանի մասին։
Այս տարի շարքը համալրվեց եւս երկու գրքով։ Եվ այդպիսով, դեկտեմբերի 8-ին փոքրիկ ընթերցողի դատին կհանձնվեն «Շառլ» եւ «Ավրորա» փոքրիկ գրքերը։
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -31-:
