Դատախազության օրվան նվիրված կայացել է հանդիսավոր նիստ. պետական պարգևների են արժանացել մի խումբ աշխատակիցներ
Այսօր՝ նոյեմբերի 26-ին, կայացել է ԱՀ դատախազության օրվան նվիրված հանդիսավոր նիստ:
Դատախազության օրվան նվիրված կայացել է հանդիսավոր նիստ. պետական պարգևների են արժանացել մի խումբ աշխատակիցներ
ՍՏԵՓԱՆԱԿԵՐՏ, 26 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նիստը վարել է ԱՀ գլխավոր դատախազի պաշտոնակատար Արամայիս Ավագյանը:Բացման խոսքում Արամայիս Ավագյանը շնորհավորել է դատախազության համակարգի բոլոր աշխատակիցներին և մաղթել անչառ աշխատանք:
Նա իր խոսքում մասնավորապես ասել է. «Ուղիղ 95 տարի առաջ, նույն այս օրն ստեղծվել է Լեռնային Ղարաբաղի մարզային դատախազությունը: Վստահաբար շեշտենք` Արցախի դատախազությունը բովանդակալից ճանապարհ է անցել` հաղթահարելով թե՛ հասարակարգերի փոփոխության, և թե՛ պետականակերտման գործընթացի բոլոր մարտահրավերները: Կարևորը` առկա խնդիրների ճիշտ գնահատումն ու համապատասխան եզրահանգումներ կատարելն է, որի իրականացմամբ է ամբողջանում դատախազության ձեռքբերումների շրջանակը: Հենվելով մեր հարուստ փորձի վրա, հանրապետության իրավապահ մյուս կառույցների ու Հայաստանի Հանրապետության դատախազության հետ արդյունավետ համագործակցություն ծավալելով, մեզ հաջողվել է օրենքի գերակայությունն ու իրավակարգի ապահովումը որակական նոր սանդղակի վրա դնել: Դրան մեծապես նպաստում է հանրապետության իշխանությունների կողմից ցուցաբերվող այն մեծ աջակցությունը, որին մենք պարբերաբար ականատես ենք լինում: Այս տոնական առիթով ուզում եմ շնորհակալություն հայտնել բոլորին շահագրգիռ փոխգործակցության ու աջակցության համար և հավատացնել, որ դատախազության մարմինները կշարունակեն նույն նվիրվածությամբ ու պատասխանատվությամբ իրականացնել իրենց լիազորությունները օրենքի գերակայության և իրավակարգի ապահովման գործում»,-մասնավորապես ասել է Ա. Ավագյանը:
Նիստին ներկա ԱՀ նախագահ Բակո Սահակյանն իր խոսքում նշել է, որ այն գործառույթները, որոնք իրականացնում է դատախազության ոլորտը, անձնակազմի մասնագիտական պատրաստվածության և վերապատրաստման, ծառայության համար համապատասխան պայմանների ապահովումը միշտ եղել են և կլինեն պետականաշինության կարևոր ուղղություններից:
«Վստահ եմ, որ կառույցն ունի անհրաժեշտ ներուժ իր առջև դրված խնդիրները արդյունավետորեն լուծելու համար, և դուք այսուհետ ևս մեծագույն պատասխանատվությամբ ու նվիրվածությամբ կշարունակեք ձեր ծառայությունը՝ ի նպաստ մեր հայրենիքի ու ժողովրդի բարօրության»,- ընդգծել է Բ. Սահակյանը:
Դատախազության օրվան նվիրված հանդիսավոր նիստին մասնակցել է Հայաստանի Հանրապետության գլխավոր դատախազ Արթուր Դավթյանը: Նա հանդես է եկել շնորհավորանքի խոսքով՝ գործընկերներին մաղթելով հաջողություններ և անսպառ եռանդ:
ԱՀ դատախազության օրվա առթիվ շնորհավորական ելույթներով հանդես են եկել նաև ԱՀ ոստիկանապետ Լևոն Մնացականյանը ու ԱՀ քննչական կոմիտեի նախագահ Իգոր Գրիգորյանը:
Մասնագիտական տոնի կապակցությամբ ԱՀ Նախագահ Բակո Սահակյանը, ԱՀ գլխավոր դատախազի պաշտոնակատար Արամայիս Ավագյանը, ՀՀ գլխավոր դատախազ Արթուր Դավթյանը, ԱՀ ոստիկանապետ Լևոն Մնացականյանը և ԱՀ քննչական կոմիտեի նախագահ Իգոր Գրիգորյանը պետական պարգևներ, կոչումներ և նվերներ են շնորհել համակարգի մի խումբ աշխատակիցների:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -40-: