Ուսանողների միջազգային տոնի առթիվ այսօր՝ նոյեմբերի 18-ին, Արցախի պետական համալսարանի 60 ուսանող 2018-2019 ուսումնական տարվա ընթացքում համալսարանական գործունեության տարբեր ոլորտներում հաջողություններ արձանագրելու համար խրախուսվել է պատվոգրերով ու մասնագիտական գրքերով:
ԱրՊՀ-ում տեղի է ունեցել պարգևատրման արարողություն
ՍՏԵՓԱՆԱԿԵՐՏ, 18 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ պարգևատրման արարողությանը բացման խոսքով հանդես է եկել ԱրՊՀ ուսխորհրդի նախագահ Լիլիթ Մարգարյանը: Նա շնորհավորել է բոլոր ուսանողներին՝ միջազգային օրվա առթիվ և մաղթել անսպառ եռանդ, անկոտրում կամք, գիտելիքների հարուստ պաշար, մասնագիտական ձեռքբերումներ ու հաջողություններ ուսման բնագավառում:
«Միշտ հիշենք, որ մեր՝ ուսանողներիս, հիմնական առաքելությունը կրթությունն է և մեր պարտքն է մեր գիտելիքներով նպաստել մայր երկրի բարօրությանը»,-ասել է նա: ԱրՊՀ ռեկտոր Արմեն Սարգսյանն իր ելույթում համալսարանի ղեկավարության, պրոֆեսորադասախոսական անձնակազմի և բոլոր աշխատակիցների անունից նույնպես շնորհավորել է ուսանողներին տոնի առթիվ: Նա նշել է, որ ներկայումս բարձրագույն կրթության բնագավառում մեծ բարեփոխումներ են կատարվում աշխարհում ու այդ բարեփոխումների հիմնական սկզբունքներից մեկը միտված է ուսանողակենտրոն համալսարանների կայացմանը:
«Ուսանողակենտրոն համալսարանի կայացումը պետք է լինի բոլորիս նպատակը, հատկապես, որ ներկայումս ԱրՊՀ-ն դիմել է հավատարմագրման, որի կարևոր դրույթներից մեկը ուսանողների մասնակցությունն է այդ աշխատանքներին: Ես հպարտությամբ պետք է հայտարարաեմ, որ նախնական հավատարմագրում անցնելու ժամանակ՝ այն իրականացնող խմբի կողմից շատ բարձր գնահատանքի է արժանացել մեր ուսանողական խորհուրդը և ուսանողական ակտիվը»,-մասնավորապես ասել է նա: Միջոցառմանը շնորհակալական ելույթներով հանդես են եկել նաև տարբեր անվանակարգերում մրցանակային տեղեր զբաղեցրած և խրախուսանքի արժանացած ուսանողներ: