Հոկտեմբերի 1-ի դրությամբ վերափորձաքննված 666 հաշմանդամից 45-ի մոտ արձանագրվել է առողջական վիճակի բարելավում. Սամվել Ավանեսյան
Հաշմանդամների սոցիալական պաշտպանության 2020 թվականի տարեկան ծրագրին և ծրագրով նախատեսված միջոցառումների ցանկին հավանություն տալու մասին ԱՀ կառավարության որոշման նախագիծը՝ նախօրեին կայացած ԱՀ կառավարության նիստին ներկայացրել է ԱՀ աշխատանիք, սոցիալական հարցերի և վերաբնակեցման նախարար Սամվել Ավանեսյանը:
Հոկտեմբերի 1-ի դրությամբ վերափորձաքննված 666 հաշմանդամից 45-ի մոտ արձանագրվել է առողջական վիճակի բարելավում. Սամվել Ավանեսյան
ՍՏԵՓԱՆԱԿԵՐՏ, 16 նոյեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ Ս. Ավանեսյանն ասել է, որ տարեկան ծրագրի նպատակը հաշմանդամների իրավունքների պաշտպանության և նրանց սոցիալական ներառման համար կենսագործունեության բոլոր ոլորտներում հավասար պայմանների ստեղծմանն ու հավասար հնարավորությունների ապահովմանն ուղղված միջոցառումների իրականացումն է:
Ըստ Ս. Ավանեսյանի՝ 2019 թվականի հոկտեմբերի 1-ի դրությամբ բժշկասոցիալական փորձաքննության կենտրոնում վերափորձաքննված 666 հաշմանդամից 45-ի մոտ արձանագրվել է առողջական վիճակի բարելավում, մասնավորապես՝ 61 անձի նկատմամբ հաշմանդամություն չի սահմանվել, 24 հաշմանդամի դեպքում վերանայվել է հաշմանդամության խումբը, 536 հաշմանդամի դեպքում խումբը մնացել է անփոփոխ: Հաշմանդամների առողջական վիճակի բարելավմանը նպաստել են նաև տարեկան ծրագրում ներառված միջոցառումները, մասնավորապես՝ հաշմանդամների առողջարանային բուժման և հանգստի կազմակերպումը, վերականգնողական օգնության տրամադրումը և այլ ծրագրերի իրականացումը:
«Հաշմանդամների խնամքը և սոցիալական սպասարկումն իրականացվում է ինչպես շուրջօրյա խնամքի հաստատությունում, այնպես էլ տնային պայմաններում։ «Ստեփանակերտի տուն-ինտերնատ» պետական ոչ առևտրային կազմակերպությունում խնամվող 81 անձից 36-ը հաշմանդամ են, որոնք գտնվում են պետության լրիվ խնամքի ներքո՝ ստանալով բժշկական օգնություն և կենսաապահովման բոլոր անհրաժեշտ միջոցները։ 2019 թվականի հոկտեմբերի 1-ի դրությամբ ԱՀ-ում բնակվող 110 սոցիալապես անապահով հաշմանդամի ընտանիքի տրամադրվել է լրացուցիչ նյութական օգնություն՝ 4 մլն 420 000 ՀՀ դրամի չափով»,-ավելացրել է նախարարը:
Նա նաև տեղեկացրել է, որ Արցախի Հանրապետության մշակույթի, երիտասարդության հարցերի և զբոսաշրջության նախարարությունը «Երիտասարդության շրջանում ազգային արժեքային կողմնորոշման ամրապնդման, երիտասարդության ռազմահայրենասիրական, հոգևոր, առողջ ապրելակերպի դաստիարակություն» ծրագրի շրջանակներում 2019 թվականի հուլիսին Ասկերանի շրջանի Նորագյուղ և Այգեստան գյուղերում սահմանափակ կարողություններով երիտասարդների համար կազմակերպել է «Ճանաչեք մեր երկիրը» ճանաչողական և մշակութաժամանցային ծրագիր, որին մասնակցել են հաշմանդամություն ունեցող 60 երիտասարդ: Սսեպտեմբերին «Ճանաչեք մեր երկիրը» ճանաչողական ծրագրի շրջանակներում կազմակերպվել է այցելություն դեպի Սուրբ Սարիբեկ և Խաչին տակ սրբավայրեր, որին մասնակցել էլ 40 հաշմանդամ։
«Կազմակերպվել են նաև էքսկուրսիաներ և այցելություններ դեպի «Մենք ենք մեր սարերը» հուշարձան, Սուրբ Հակոբ եկեղեցի և Դադիվանք վանական համալիր: 2019 թվականի սեպտեմբերին «Երիտասարդ հաշմանդամների ճամբար Սևանա լճի ափին» միջոցառմանը մասնակցել է 20 հաշմանդամ»,-նշել է Ս. Ավանեսյանը:
Խոսելով ներառական կրթության մեջ ընդգրկված երեխաների մասին՝ նախարարը տեղեկացրել է, որ 2019-2020 ուսումնական տարում հանրապետությունում գրանցվել է 451 աշակերտ, որոնցից տնային ուսուցման մեջ ընդգրկված են 60-ը, իսկ 82-ն էլ համապատասխան մասնագետների կողմից ստանում են մանկավարժահոգեբանական աջակցություն։ Կրթության առանձնահատուկ պայմանների կարիք ունեցող երեխաներից ոչ բոլորն ունեն հաշմանդամ երեխայի կարգավիճակ։
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -24-: