Մատենադարան-Գանձասար գիտամշակութային կենտրոնում այսօր տեղի է ունեցել գրադարան-ընթերցասրահի բացման արարողություն:
Մատենադարան-Գանձասար գիտամշակութային կենտրոնում բացվել է գրադարան-ընթերցասրահ
ՍՏԵՓԱՆԱԿԵՐՏ, 15 նոյեմբերի, ԱՐՑԱԽՊՐԵՍ: Գրադարան-ընթերցասրահի բացմանը մասնակցել են ԱՀ նախագահ Բակո Սահակյանը, Արցախի թեմի առաջնորդ Պարգև արքեպիսկոպոս Մարտիրոսյանը, ԱՀ կրթության, գիտության և սպորտի նախարար Նարինե Աղաբալյանը, ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը, Մարտակերտի շրջվարչակազմի ղեկավար էդգար Հարությունյանը և այլք:
Նրանք ծանոթացել են գրադարան-ընթերցասրահի հնարավորություններին և շենքային պայմաններին:
ԱՀ նախագահն առաջինն է օգտվել գրադարան-ընթերցասրահից՝ ծանոթանալով իր պատվիրած «Վեհամոր Ավետարանը» ձեռագրին:
«Արցախպրես»-ի թղթակցի հետ զրույցում Երևանի Մեսրոպ Մաշտոցի անվան Մատենադարանի տնօրեն Վահան Տեր-Ղևոնդյանն ասել է, որ գրադարան-ընթերցասրահի բացման մտահղացումը եղել է ԱՀ ԿԳՍ նախարար Նարինե Աղաբալյանինը:
«Տարիներ առաջ այս գաղափարի իրականացումն անհավանական էր թվում: Գրադարան-ընթերցասրահի բացմամբ՝ մենք այսօր Մատենադարան-Գանձասար գիտամշակութային կենտրոնի և Երևանի Մեսրոպ Մաշտոցի անվան Մատենադարանի միջև համակարգչային ուղիղ կապ հաստատեցինք: Այդ կապը մեզ հնարավորություն է տալու էլեկտրոնային եղանակով օգտվել Երևանի Մեսրոպ Մաշտոցի անվան Մատենադարանի բոլոր ձեռագրերից: Գրադարան-ընթերցասրահից օգտվելու համար յուրաքանչյուր ոք պետք է նախապես դիմում ուղարկի մեր էլեկտրոնային հասցեին՝ ստանա թույլտվություն, որից հետո շուրջ 3 ամիս կկարողանա անվճար օգտվել թվայնացված ձեռագրից: Եթե պատվիրատուի նախընտրած ձեռագիրը թվայնացված է, ապա մեկ օրում այն հասանելի է դառնում, իսկ եթե թվայնացված չէ, ապա 2 օրվա ընթացքում է այն հասանելի լինում: Ներկայումս Մատենադարանի ձեռագրերի ավելի քան 30 %-ն է թվայնացված: Գրադարան-ընթերցասրահում մենք ապահովել ենք անվտանգությունը, մատչելիությունը, հասանելիությունը: Օգտվողին հնարավորություն չի տրվում պատճենահանել, կամ կրիչի միջոցով ձեռագիրը վերցնել. այն միայն հասանելի է գրադարան-ընթերցասրահում»,- ավեացրել է Վահան Տեր-Ղևոնդյանը՝ ընդգծելով, որ գրադարան-ընթերցասրահի բացումն Արցախում բացառիկ երևույթ է:
Վահան Տեր-Ղևոնդյանը գրադարան-ընթերցասրահի պայմանների ապահովմանն աջակցելու համար «Ղարաբաղ Տելեկոմ» ընկերության գլխավոր տնօրեն Կարեկին Օդաբաշյանին և Մարտակերտի շրջվարչակազմի ղեկավար Էդգար Հարությունյանին է հանձնել շնորհակալագրեր և նվերներ:
Տեղեկացնենք, որ Մեսրոպ Մաշտոցի անվան Մատենադարանի թիվ 10680 ձեռագիրը՝ «Վեհամոր Ավետարանը» ձեռագիրը, համարվում է մեզ հասած հայերեն հնագույն ամբողջական ձեռագիրը, որն ըստ հնագրական տվյալների, կարող է ստեղծված լինել 7-րդ դարում։ Քանի որ հայերեն նշանավոր Ավետարաններին սովորաբար հատուկ անուններ են տրվել, այս հնագույն ձեռագիրը նույնպես անվանակոչվել է։ Ձեռագիրը Մատենադարանին է նվիրել երջանկահիշատակ Ամենայն Հայոց կաթողիկոս Վազգեն Ա Վեհափառը 1975 թ-ին, ի հիշատակ իր մոր՝ Սիրանույշ Պալճյանի, որի համար էլ մատյանին տրվել է «Վեհամոր Ավետարան» անունը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -54-:
