Արցախի ներդրումային հիմնադրամին տրամադրվող ֆինանսական աջակցությունը 2020 թվականին կկազմի 4 մլրդ դրամ՝ պահպանելով 2019 թվականի մակարդակը:
Արցախի ներդրումային հիմնադրամին տրամադրվող ֆինանսական աջակցությունը 2020 թվականին կկազմի 4 մլրդ դրամ. ԱՀ ֆիննախ
ՍՏԵՓԱՆԱԿԵՐՏ, 14 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած ԱՀ կառավարության նիստի ժամանակ ասել է ԱՀ ֆինանսների նախարար Արթուր Հարությունյանը:
Նրա խոսքով՝ նախատեսվող գումարները կուղղվեն փոքր և միջին ձեռնարկատիրության սուբյեկտների պետական աջակցության ապահովմանը, բնակարանաշինության ծրագրերի և բանկերի կողմից հիփոթեքային վարկավորմամբ բնակարանների ու բնակելի տների ձեռք բերման համար տրամադրվող հիփոթեքային վարկերի տարեկան տոկոսադրույքների մասնակի սուբսիդավորմանը, գյուղաբնակ քաղաքացիներին բնակելի տների ձեռքբերման և վերանորոգման համար փոխառությունների տրամադրմանը: Ինչպես նաև շրջկենտրոններում և այլ բնակավայրերում բնակելի տարածքների կառուցման, վերանորոգման և ձեռքբերման համար փոխառությունների հատկացմանն ու ձեռնարկատիրության զարգացմանն ուղղված այլ նպատակային ծրագրերի իրականացմանը:
«Տնտեսական ոլորտում «Ընթացիկ նորոգման, բարեկարգման և կոմունալ տնտեսության գծով Արցախի Հանրապետության շրջանների կարողությունների զարգացման» ծրագրի շրջանակներում նախատեսվում է հատկացնել 2.8 մլրդ դրամ, որը 2019 թվականի համեմատ կնվազի 200 մլն դրամով, ինչը հիմնականում պայմանավորված է շրջաններում սանմաքրման գծով աշխատանքներին հատկացվելիք գումարների համայնքային բյուջեներ տեղափոխմամբ, որը համաձայն «Աղբահանության և սանիտարական մաքրման մասին» օրենքը պետք է ֆինանսավորվի համայնքային բյուջեներից: 2020 թվականի պետական բյուջեի նախագծով նախատեսվում է կատարել 19 մլրդ 740 մլն դրամի կապիտալ ներդրումներ: Հատկացված միջոցների հաշվին իրականացվող աշխատանքների շրջանակում հատուկ ուշադրություն է դարձվելու բնակարանաշինության ծրագրերի, ինչպես նաև տնտեսության ճյուղերի և ենթակառուցվածքների զարգացմանն ու սոցիալական նշանակություն ունեցող բազմաթիվ այլ ծրագրերի իրականացմանը»,- մասնավորապես ասել է նախարարը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -37-:
