ԱՀ կրթության, գիտության և սպորտի նախարարությունում այսօր տեղի է ունեցել պարգևատրման արարողություն:
Նարինե Աղաբալյանը Սերգեյ Մինասյանին պարգևատրել է «Անանիա Շիրակացի» մեդալով
ՍՏԵՓԱՆԱԿԵՐՏ, 13 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ԱՀ ԿԳՍ նախարար Նարինե Աղաբալյանն ԱՀ նախագահի հրամանի համաձայն՝ Հայաստանի պետական ճարտարագիտական (Պոլիտեխնիկ) համալսարանի տնտեսագիտություն և կառավարում ամբիոնի վարիչ, տեխնիկական գիտությունների դոկտոր, պրոֆեսոր, Սերգեյ Մինասյանին՝ Արցախի կրթության և գիտության բնագավառում մատուցած ծառայությունների համար պարգևատրել է «Անանիա Շիրակացի» մեդալով: 
Ն. Աղաբալյանը շնորհավորել է Ս. Մինասյանին՝ ասելով, որ նրա կատարած աշխատանքը գնահատվել է ԱՀ իշխանությունների կողմից:
Նա իր խոսքում ասել է, որ Ս. Մինասյանը մեծ դերակատարություն ունի Արցախի տնտեսության զարգացման գործում:
Դիմելով Ս. Մինասյանին նախարարն ավելացրել է. «Ձեր մասնագիտական գիտելիքներով դուք կարող եք օգտկար լինել մեր երկրի զարգացմանը: Վստահ եմ, որ այս պարգևը սիրով եք ընդունեք, որն էլ լինելու է Ձեր ծննդյան 70-ամյակի ամենալավ ու հիշարժան նվերը»:
Ս. Մինասյանն իր հերթին շնորհակալություն է հայտնել Ն. Աղաբալյանին, իր տարիների կատարած աշխատանքը գնահատելու համար:
Մեզ հետ զրույցում նա ասել է. «Արդեն 10 տարի է, ինչ Արցախում բացել ենք Հայաստանի ճարտարագիտական ակադեմիայի Լեռնային Ղարաբաղի մասնաճյուղը, որի ղեկավարն է ԱՀ Ազգային ժողովի պատգամավոր Արպատ Ավանեսյանը: Այս տարիների ընթացքում մենք իրականացրել ենք մի շարք աշխատանքներ: Հանքարդյունաբերության, էներգետիկայի ոլորտներում ևս իրականացրել ենք համատեղ աշխատանքներ. դրանք լինելու են շարունակական»:
Արպատ Ավանեսյանը ևս բարձր է գնահատել Ս. Մինասյանի ներդրումն Արցախի կրթության և գիտության ոլորտում:
Ա. Ավանեսյանը հավելել է, որ Հայաստանի ճարտարագիտական ակադեմիայի Լեռնային Ղարաբաղի մասնաճյուղը սերտ համագործակցում է հայաստանյան կառույցի հետ, որի շրջանակներում տնտեսության զարգացման ուղղությամբ իրականացվում են մի շարք աշխատանքներ: Առաջիկայում նախատեսում են նոր մեթոդով իրականացնել մրգերի չրեր:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -47-:
