«Թալիշի միջնակարգ դպրոցի բակը տևական լռությունից հետո վերստին լցվել է երեխաների հորդաբուխ ծիծաղով և ժպիտներով:
«Հայաստանի Հանրապետություն» օրաթերթ. Թալիշի նորակառույց դպրոցը բացեց հյուրընկալ դռները
ՍՏԵՓԱՆԱԿԵՐՏ, 11 նոյեմբերի, ԱՐՑԱԽՊՐԵՍ։ 2016 թ. ապրիլյան ողբերգական իրադարձությունների պատճառով մարդիկ ստիպված էին ընտանիքներով հեռանալ հարազատ օջախներից և ժամանակավորապես բնակվել տարբեր վայրերում: Նրանց մի մասը բնավորվել էր Ալաշանում և, չկորցնելով նորից ծննդավայր վերադառնալու հույսը` թախանձախնդիր, կարոտով սպասում էր բարի օրվան: Եվ ահա եռամյա դեգերումներից հետո վերջապես մարդիկ Թալիշում են, իրենց նորոգ, ոմանք էլ` նոր կառուցված հարմարավետ տներում: Իսկ նորակառույց կրթօջախն իր հյուրընկալ դռներն է բացել աշակերտների առաջ:
Առօրյա հոգսերով ապրող գյուղը, որ բարեկարգվել, վերակառուցվել, միանգամայն նոր տեսք է ստացել, կարոտով պահում է թալիշցիների ճամփան` լուսավոր ու պայծառ գալիք խոստանալով նրանց: «Վերածնված Թալիշը, հայացքը ապագային հառած, մոր պես գրկաբաց ընդունում և գուրգուրոմ է իր զավակներին, թևերի տակ առնելով` ջերմացնում նրանց»,- ասում է համայնքի ղեկավար Վիլեն Պետրոսյանը` տուն հրավիրելով բոլոր թալիշցիներին»:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -58-:
