Այսօր՝ հոկտեմբերի 19-ին, Ստեփանակերտի մշակույթի և երիտասարդության պալատի դահլիճում կայացած պարգևատրման արարողության ժամանակ հավաստագրեր են հանձնվել «Քրիստոնյաները կարիքի մեջ» հասարակական կազմակերպության նախաձեռնությամբ Ստեփանակերտի Մեսրոպ Մաշտոց համալսարանում անց կացված անգլերենի (սկսնակ և միջանկյալ) և իտալերենի (սկսնակ և բարձր) դասընթացների մասնակիցներին:
Ստեփանակերտում անցկացված անգլերենի և իտալերենի դասընթացների մասնակիցներին հանձնվել են հավաստագրեր
ՍՏԵՓԱՆԱԿԵՐՏ, 19 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել «Քրիստոնյաները կարիքի մեջ» հասարակական կազմակերպության փոխնախագահ, Նյու Յորքի Մանհեթենվիլ քոլեջի փիլիսոփայության պրոֆեսոր Շվոն Նեշ-Մարշալը:Նա նշել է, որ շատ ուրախ է Արցախում նման մակարդակով դասընթացներ կազմակերպելու համար և վստահեցրել, որ այն կկրի շարունակական բնույթ:
Արարողությանը ներկա Արցախի Հանրապետության կրթության, գիտության և սպորտի նախարար Նարինե Աղաբալյանն իր ելույթում մասնավորապես նշել է, որ այսօր օտար լեզուների վատ իմացությունը մեր հանրապետության զարգացմանը խոչընդոտող խնդիրներից մեկն է, և ողջունելի է այդ խնդրի լուծմանն ուղղված յուրաքանչյուր քայլ:
«Ուրախ եմ, որ արցախցի երեխաներն ու երիտասարդները կարևորելով օտար լեզվի իմացությունը սիրով հաճախել են «Քրիստոնյաները կարիքի մեջ» հասարակական կազմակերպության նախաձեռնությամբ կազմակերպված դասընթացներին:Լեզուների իմացությունը երիտասարդների առջև բացում է հսկայական հնարավորություններ:Ցանկանում եմ շնորհակալություն հայտնել կազմակերպությանը, Շվոն Նեշ-Մարշալին, մեր հայրենակցուհի Անտոնիա Ասլանին և կազմակերպության նախագահ Ռիտա Մահտեսյանին»,-ասել է նա:
Նարինե Աղաբալյանը ԱՀ կրթության, գիտության և սպորտի նախարարության կողմից Շվոն Նեշ-Մարշալին է հանձնել շնորհակալագիր՝ Արցախում բարեգործական ծրագրերի իրականացման, քրիստոնեական արժեքների պահպանման և տարածման համար:
«Ի դեմս Ձեզ Արցախը ձեռք է բերել ևս մեկ բարեկամ, ով իր աջակցության ձեռքն է մեկնել Արցախին՝ օգնելով հաղթահարել անարդարացի մեկուսացումը և ապրել խաղաղության մեջ:Հուսով եմ, որ մեր բարեկամությունը կլինի շարունակական և կնպաստի Արցախի զարգացմանը»,-ասել է Ն. Աղաբալյանը:
