Արդեն իններորդ տարին է, ինչ ԱՀ գյուղատնտեսության նախարարությունը Գյուղատնտեսության աշխատողի օրվան նվիրված Ստեփանակերտում կազմակերպում է բերքի տոն:
Գյուղատնտեսությամբ զբաղվելը չափազանց կարևոր ու կենսական նշանակություն ունեցող խնդիր է. Ժիրայր Միրզոյան
ՍՏԵՓԱՆԱԿԵՐՏ, 12 հոկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ գյուղատնտեսության նախարար Ժիրայր Միրզոյանը:
Նա նշել է, որ ամեն տարի բերքի տոնի մասնակիցների թիվն ավելանում է. նախորդ տարիների համեմատ այս միջոցառումն ամենաբազմամարդն է:
Բերքի տոնին մասնակցելու համար այս տարի գյուղնախարարությունում հայտագրվել է 1020 անհատ, սակայն մասնակցել են 1200-ը. գյուղմթերքը ներկայացնելու և վաճառելու համար չհայտագրված 180 հոգին ևս ապահովվել են անվճար տեղերով: ԱՀ գյուղատնտեսության նախարարության կողմից ֆինանսավորվել են տրանսպորտային բոլոր ծախսերը։ Պայմանավորվածություն է ձեռքբերվել, որպեսզի տնտեսվարողները մթերքները վաճառեն շուկայականից ցածր գներով։
Խոսելով բերքի տոնին ամենաշատ պահանջարկ ունեցող գյուղմթերքների մասին՝ Ժ. Միրզոյանն առանձնացրել է սոխը, կարտոֆիլը և մսամթերքը:
Նախարարն ասել է նաև, որ գյուղատնտեսական տարին այնքան էլ բարեհաջող չի եղել՝ մանավանդ դաշտավարային մշակաբույսերի համար, իսկ բանջարեղենի և այգեգործության ճյուղերում ավելի լավ ցուցանիշներ է արձանագրվել, քան նախորդ տարի:
Անդրադառնալով բերքի տոնին՝ Ժ. Միրզոյանը ավելացրել է. «Այս տոնը համաժողովրդական տոն է, քանի որ յուրաքանչյուր քաղաքացի որևէ կերպ առնչվում է գյուղատնտեսության հետ, որի համար էլ շնորհավորում եմ բոլորիս: Հատկապես նրանց, ովքեր ակտիվ աշխատանքներ են իրականացնում գյուղոլորտում՝ զբաղվելով՝ անասնապահությամբ, այգեգործությամբ, բանջարաբոստանային կուլտուրաների մշակմամբ և այլն: Գյուղատնտեսությամբ զբաղվելը չափազանց կարևոր ու կենսական նշանակություն ունեցող խնդիր է բոլորի համար: Գյուղատնտեսության ոլորտից ստացած սպասելիքները երբ արդարանում են, ուրեմն տարին հաջողված է»:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -25-:
