Եթե ավանդական գյուղատնտեսության հիմքում դրված են եկամուտները, ապա օրգանական գյութատնտեությունը նպատակաուղղված է բարելավելու գյուղատնտեսական մթերքների արտադրությունը սոցիալական, բնապահպանական և տնտեսական տեսնկյունից:
Արցախն ունի բնակլիմայական այն բոլոր նպաստավոր պայմանները, որոնք հնարավորություն են տալիս օրգանական գյուղատնտեսության զարգացմանը. մասնագետ
ՍՏԵՓԱՆԱԿԵՐՏ, 10 հոկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «Կանաչ արահետ» հասարակական կազմակերպության տնօրեն Նունե Սարուխանյանը, ով այսօր կազմակերպած գիտագործնական կոնֆերանսի ժամանակ հանդես է եկել «Օրգանական գյուղատնտեսության ներկա իրավիճակը և զարգացման հեռանկարները» թեմայով:
Ն. Սարուխանյանի խոսքով՝ Արցախն ունի բնակլիմայական այն բոլոր նպաստավոր պայմանները, որը հնարավորություն է տալիս օրգանական գյուղատնտեսության զարգացմանը:
«Եթե ՀՀ-ում արդեն իսկ կայացման փուլում է օրգանական գյուղատնտեսության մասնագետների ինստիտուտը, ապա Արցախում այդ խնդիրը դեռևս մնում է չլուծված: Կարծում եմ՝ այդ ուղղությամբ առաջիկայում մի շարք քայլեր կձեռնարկվեն: Մեր կազմակերպությունը միշտ պատրաստակամ է օգտակար լինել այս ոլորտի մասնագետների վերապատրաստմանը: Ի դեպ, բոլոր ցանկացողները կարող են անդամակցել «Կանաչ արահետ» ՀԿ-ին, և մենք այդ անհատներին աջակցելու միջոցով այստեղ հիմք կդնենք օրգանական գյուղատնտեսության զարգացմանը»,-ավելացրել է Ն. Սարուխանյանը:
Նա նշել է, որ սպառողներն օրգանական գյուղատնտեսության արտադրանքի համար պատրաստ են վճարել ավելի թանկ:
«Մենք ունենք նաև դուստր կազմակերպություն, որը զբաղվում է օրգանական գյուղատնտեսական մթերքների իրացմամբ: Մոտ 30-50 % ավելի թանկ ենք վաճառում մթերքները. մինչև հիմա չենք ունեցել որևէ գնորդ, ով բողոքի գներից: Կարծում եմ՝ Արցախում պետք է ստեղծվի փորձացուցադրական կենտրոն, որտեղ կուսուցանվեն մասնագետներ, ովքեր հետագայում արտադրելով օրգանական մթերք՝ կվաճառեն ավելի թանկ»,-հավելել է մեր զրուցակիցը:
Նշենք, որ հոկտեմբերի 13-ին Ստեփանակերտում կայանալիք բերքի տոնին «Կանաչ արահետ» ՀԿ-ն առանձին տաղավարով կներկայացնի օրգանական գյուղատնտեսական մթերքների արտադրանք:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -51-:
