«Գյուղատնտեսության ներկան և ապագան» խորագրով գիտագործնական կոնֆերանսի չորրորդ փուլը նվիրված էր սննդամթերքի անվտանգությանը և ագրոմշակմանը
ԱՀ գյուղատնտեսության նախարարության նախաձեռնությամբ Ստեփանակերտի N1 հիմնական դպրոցի հահլիճում այսօր կազմակերպվել է «Գյուղատնտեսության ներկան և ապագան» խորագրով գիտագործնական կոնֆերանսի չորրորդ փուլը, որը նվիրված էր սննդամթերքի անվտանգությանը և ագրոմշակմանը:
«Գյուղատնտեսության ներկան և ապագան» խորագրով գիտագործնական կոնֆերանսի չորրորդ փուլը նվիրված էր սննդամթերքի անվտանգությանը և ագրոմշակմանը
ՍՏԵՓԱՆԱԿԵՐՏ, 10 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ կոնֆերանսին բացման խոսքով հանդես է եկել ԱՀ գյուղատնտեսության նախարար Ժիրայր Միրզոյանը:
Նրա խոսքով՝ սննդամթերքի անվտանգության ապահովման գործառույթն ունի միջգերատեսչական բնույթ. այն միայն սննդամթերքի անվտանգության պետական ծառայության խնդիրը չէ:
«Գյուղնախարարությունն իր բոլոր ռեսուրսներով նպաստում է, որպեսզի յուրաքանչյուր սննդամթերք, որն ունի կենդանական կամ բուսական ծագում լինի ավելի անվտանգ: Մենք հանդիպում ենք մի շարք խնդիրների, որոնց լուծման համար առաջին հերթին կազմակերպում ենք ուսուցողական դասընթացներ, որոնք վարում են հրավիրված մասնագետները»,- ավելացրել է Ժ. Միրզոյանը:
Անդրադառնալով օրգանական գնուղատնտեսության անցնելու գաղափարին՝ նախարարն ասել է, որ այդ հարցն ընկած է նախարարության բոլոր ծրագրերի հիմքում՝ այդ թվում անասնաբուծության, բուսաբուծության, ոռոգման համակարգերի և տեխնոլոգիաների:
ԱՀ առողջապահության նախարար Արայիկ Բաղրյանը մեզ հետ զրույցում ասել է, որ օրգանական գյուղատնտեսությունը շատ կարևոր դեր ունի ազգաբնակչության համար:
Ըստ նախարարի՝ ավանդական գյուղատնտեսության մեջ օգտագործվում է տարատեսակ քիմիական նյութեր, իսկ օրգանական գյուղատնտեսությունը ենթադրում է բնական հումք: Պետք է կանխարգելել քիմիական նյութերի պարունակությամբ մթերքները, որը միանշանակ վնասակար է մարդկանց առողջությանը:
Կոնֆերանսին մասնակից ՀՀ սննդամթերքի անվտանգության տեսչական մարմնի արտադրության և վերահսկողության բաժնի պետ Առուշան Ալթունյանը՝ խոսելով իրենց կառույցի գործառույթների մասին, ասել է, որ իրենք իրականացնում են տեսչական ստուգումներ, դիտարկումներ, ինչպես նաև խորհրդատվություն՝ տնտեսվարող սուբյեկտների շրջանակներում:
«Մեր կառույցն ունի իր ստորաբաժանումները և յուրաքանչյուր արտադրանքի ներմուծման ժամանակ իրականացվում են փաստաթղթային, մակնշման, անհրաժեշտության դեպքում նաև լաբորատոր փորձարկման միջոցներ՝ այդ կերպ պարզելով սննդամթերքի անվտանգության հարցը: Ներքին շուկայում պարբերաբար իրականացվում են նաև ուսումնասիրություններ և ստուգումներ: Վերահսկողությունն իրականացվում է օրենքի շրջանակներում»,-ավելացրել է Ա. Ալթունյանը՝ նշելով, որ իրենց կառույցը սերտ համագործակցության մեջ է Արցախի ՍԱՊ ծառայության հետ:
Կոնֆերանսին սննդամթերքի անվտանգության և ագրոմշակմանը վերաբերյալ թեմաներով ելույթ են ո ւնեցել գյուղատնտեսության ոլորտի մասնագետներ՝ ԱՀ-ից և ՀՀ-ից. նրանք պատասխանել են նաև միջոցառման մասնակիցների հարցերը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -49-: