Ֆրեզնոյի բժշկական առաքելության և «Chevy Chase» կազմակերպության մասնագետների կողմից հանրապետությունում իրականացվում են վիրահատություններ
ԱՄՆ Կալիֆորնիա նահանգի Ֆրեզնո քաղաքի բժշկական առաքելության և «Chevy Chase» կազմակերպության մասնագետների կողմից, ԱՀ տարբեր բժշկական հաստատություններում իրականացվում են հանրապետության բնակչության անվճար խորհրդատվություններ, հետազոտություններ և անհրաժեշտության դեպքում նաև վիրահատական միջամտություններ:
Ֆրեզնոյի բժշկական առաքելության և «Chevy Chase» կազմակերպության մասնագետների կողմից հանրապետությունում իրականացվում են վիրահատություններ
ՍՏԵՓԱՆԱԿԵՐՏ, 9 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Ֆրեզնոյից Արցախ ժամանած բժիշկների խմբի համակարգող, ատամնաբույժ Վաչե Վասիլյանն ասել է, որ արդեն երրորդ տարին է, ինչ իրենք այցելում են Արցախ:
Նրա խոսքով՝ այս անգամ խմբում ընդգրկվել են 28 բժիշկներ հետևյալ մասնագիտություններով՝ սրտաբան, անոթային և ընդհանուր վիրաբույժներ, գինեկոլոգ, թերապևտ, գաստրոէնտերոլոգ, ակնաբույժ և ընտանեկան բժիշկ: Բժիշկների մեծ մասն աշխատանքներ է իրականացնում Հանրապետական բժշկական և Ստեփանակերտի մոր և մանկան առողջության պահպանման կենտրոններում, իսկ մի մասն էլ Մարտակերտի շրջանային հիվանդանոցում և «Դենտեքս Դենտալ» ատամնաբուժարանում:
«Մենք այստեղ ենք, որպեսզի տեղի մասնագետների հետ իրականացնենք փորձի փոխանակում, ինչպես նաև նրանց ծանոթացնենք առողջապահության ոլորտի վերջին նորություններին: Մեր բժիշկները նաև իրականացնում են բացառիկ վիրահատություններ, որի ընթացքում ուսուցանում են թե ինչպես կարելի է կարճ ժամանակում այն իրականացնել: Օրվա ընթցքում կատարում ենք 15-20 վիրահատություն և հետազոտում են 25-30 քաղաքացու: Այն հիվանդները, ովքեր դեղորայքի կարիք են ունենում մենք անվճար տրամադրում ենք»,- մասնավորապես ա սել է Վ. Վասիլյանը:
Նա տեղեկացրել է նաև, որ Ֆրեզնոյի Հայ օգնության միության մայր մասնաճյուղի աջակցությամբ դեղորայք և մի շարք բուժսարքավորումներ նվիրաբրեցինք հանրապետական բժշկական կենտրոնին, Ստեփանակերտի ծննդատանը: Քաշաթաղի շրջանի Կովսականի տեղամասային հիվանդանոցն էլ հագեցվել է ատամնաբուժական սարքավորումներով:
Վիրաբույժ Վան Պողոսյանի խոսքով՝ ինքը տեղի մասնագետների հետ իրականացնում է բացառիկ վիրահատություններ, որոնք մինչև հիմա չի կատարվել ԱՀ-ում:
«Տեղի մասնագետները բավականին բանիմաց են ու գրագետ: Ամեն տարի էլ ավելի է բարելավվում նրանց հմտությունները»,- ասել է վիրաբույժը:
«Chevy Chase» կազմակերպության ակնաբույժ Մերելի Համփարյանն էլ մեզ հետ զրույցում ասել է, որ քաղաքացիների մեծ մասի մոտ տարածված էր աչքի կատարակտա և գլաուկոմա հիվանդությունները:
«Մեր այցի ընթացքում մենք իրականացրել ենք շուրջ 30 հիվանդի հետազոտություն. սպասում են 50 քաղաքացի: Մենք բերել ենք անհրաժեշտ սարքավորումներ, որպեսզի նոր մեթոդներով իրականացնենք նաև վիրահատություններ»,-ավելացրել է Մ. Համփարյանը: