2018 թվականին ընդհանուր գյուղատնտեսության համախառն արտադրանքի կառուցվածքում բուսաբուծության ճյուղը կազմել է շուրջ 36,5 մլրդ դրամ, որը 2007 թվականի համեմատ աճել է 21,8 մլրդ դրամով կամ 2,5 անգամ:
Արցախում բացի նռան այգիներից ավելացել են նաև մերձարևադարձային պտղատեսակների տարածքները. փոխնախարար
ՍՏԵՓԱՆԱԿԵՐՏ, 2 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին՝ այսօր Մարտունու շրջանի Կարմիր շուկա համայնքում կազմակերպված «Գյուղատնտեսության ներկան և ապագան» խորագրով գիտագործնական կոնֆերանսի ժամանակ ասել է ԱՀ գյուղատնտեսության փոխնախարար Վիլեն Ավետիսյանը:
Նա նշել է, որ 2019 թվականին ևս շարունակվել է ԱՀ կառավարության կողմից պետական աջակցության տրամադրման գործընթացը՝ գյուղատնտեսության զարգացման ծրագրերի շրջանակներում: Ընթացիկ տարվա բուսաբուծության ճյուղի զարգացմանն ուղղված միջոցառումներն իրականացվել են բուսաբուծության համալիր զարգացման ծրագրի տեսքով:
Խոսելով գյուղնախարարության կողմից իրականացված միջոցառումների մասին՝ Վ. Ավետիսյանն առանձնացրել է գարնանացան մշակաբույսերի սերմերի և հանքային պարարտանյութերի անհատույց, բանջարեղենի մշակությամբ և ջերմոցային տնտեսությամբ զբաղվող անձանց անհատույց ֆինանսական միջոցների, այգեգործության զարգացման ծրագրի շրջանակներում նռան տնկիների, ծխախոտի մշակությունից ստացված բերքի իրացման (մթերման) դիմաց լրավճարի տրամադրումը:
«Ընթացիկ տարում հանրապետությունում գյուղատնտեսական մշակաբույսերի շուրջ 86 հազար հա ցանքատարածություններից գարնանացան մշակաբույսերի տարածքները կազմել են 21 հազար 525 հա՝ ներառյալ հասկավոր հացահատիկային մշակաբույսերը կամ ընդհանուր ցանքատարածքների 25 %-ը: 2018 թվականին այդ ցուցանիշը կազմում էր 17 %, իսկ 2010 թվականին՝ 8,4: Բանջարեղենի մշակությամբ զբաղվող անձանց անհատույց ֆինանսական միջոցների տրամադրման ծրագրից 2018 թվականին օգտվել են հանրապետության 49 համայնքներից 149 հողօգտագործող: Բանջարեղենի մշակության համար 1 հա-ի դիմաց հողօգտագործողներին է տրամադրվել շուրջ 200 հազար ՀՀ դրամ, պոմիդոր մշակելու համար՝ 250.000, կարտոֆիլի համար՝ 150.000 միանվագ գումար»,-ավելացրել է փոխնախարարը:
Նա նշել է, որ 2019 թ-ին այգեգործության զարգացման ծրագրի շրջանակներում նախապատվությունը տրվել է նռան այգիների տարածքների ընդլայնմանը:
Վ. Ավետիսյանն իր խոսքում նաև ասել է. «Ներկայումս գյուղատնտեսության ոլորտում կատարվող բարեփոխումները, այդ թվում ոռոգման ջրի կայուն և բավարար մատակարարման ուղղությամբ տարվող աշխատանքները, ազատ շուկայական հարաբերությունները, ինչպես նաև մթերող և վերամշակող կազմակերպությունների ակտիվացումը նոր հնարավորություններ են ստեղծում գյուղացիական տնտեսություններում պտղատու տնկարկների մակերեսների ընդլայման և հողակտորներն ավելի արդյունավետ օգտագործելու համար: Այդ տեսակետից ընդարձակվում են նաև նռան տնկարկները, որի նպատակով հանրապետության 175 հողօգտագործողների, գարնան տունկի համար, անհատույց տրամադրվել է ավելի քան 324 հազար նռան տնկի, որով հիմնադրվել է շուրջ 530 հա նռան այգի: Բացի նռան այգիներից ավելացել են նաև մերձարևադարձային, հնդավոր և կորիզավոր այլ պտղատեսակների այգիների տարածքները՝ հասնելով շուրջ 4500 հա-ի»:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -51-:
