ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանն այսօր՝ սեպտեմբերի 18-ին, ԱՀ կառավարության նիստին ներկայացրել է «Մարդատար-տաքսի ավտոմոբիլներով ներհանրապետական և (կամ) միջպետական ուղեվորափոխադրումների կազմակերպման գործունեության լիցենզավորման կարգը և լիցենզիայի ձևերը հաստատելու և ԼՂՀ կառավարության 2015 թվականի դեկտեմբերի 28-ի N 926-Ն որոշումն ուժը կորցրած ճանաչելու մասին» ԱՀ կառավարության որոշման նախագիծը:
Հանրապետություն ներկրվող տրանսպորտային միջոցների աճը նպաստել է ոլորտում թեթև մարդատար ավտոմոբիլներով ուղևորափոխադրումների իրականացման գերարագ տեմպերով զարգացմանը. նախարար
ՍՏԵՓԱՆԱԿԵՐՏ, 18 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Լ. Գրիգորյանն ասել է, որ ԱՀ-ում մարդատար-տաքսի ավտոմոբիլներով ուղևորափոխադրումների կազմակերպման գործունեությունը կարգավորվում է 2008 թվականին ընդունված լիցենզավորման եղանակով:
Նախարարն իր խոսքում մասնավորապես ասել է. «Թեթև մարդատար ավտոմոբիլներով տաքսի ծառայությունների ոլորտում զբաղված սուբյեկտները գործունեություն են ծավալում ոչ միայն Հանրապետության տարածքում, այլ արդեն նաև մեր հանրապետության տարածքից դուրս։ Տարիների ընթացքում հանրապետություն ներկրվող տրանսպորտային միջոցների պարբերական աճը նպաստել է ոլորտում թեթև մարդատար ավտոմոբիլներով ուղևորափոխադրումների իրականացման գերարագ տեմպերով զարգացմանը և այդ փոխադրումների աշխարհագրության ընդլայնմանը, ու այսօր դրանցով կազմակերպվում են նաև փոխադրումներ դեպի ՌԴ-ն տարբեր քաղաքներ: Առայսօր նշված գործունեությամբ զբաղվող սուբյեկտները դուրս են մնացել իրավական կարգավորման դաշտից, բարձրացնելով ուղևորների փոխադրման վտանգի ռիսկային գործոնը: Միջպետական փոխադրումների կարգավորման մեխանիզմները ներդրվեցին «Ավտոմոբիլային տրանսպորտի մասին» և «Լիցենզավորման մասին» օրենքներում լրացումների ու փոփոխությունների արդյունքում: Ներդրվեցին ներհանրապետական և միջպետական ուղևորափոխադրումների հասկացությունները»:
Լ. Գրիգորյանն ավելացրել է նաև, որ նախագծով հաստատվող կարգը սահմանում է լիցենզիայի և լիցենզիայի ներդիրների հատկացման կարգը, տրանսպորտային միջոցներին և վարորդներին ներկայացվող պարտադիր պահանջները, լիցենզիայի ուժի մեջ մտնելու և մերժելու կարգը, պետական այլ շահագռգիռ մարմինների միջև տեղեկատվության փոխանակման ձևերը և այլ անհրաժեշտ իրավակարգավորումներ։
«Նախագծի ընդունումը բացի հաշվառման և հարկային դաշտ բերելու խնդրի լուծումից կնպաստի նաև Արցախի Հանրապետությունից կազմակերպվող մարդատար-տաքսի ավտոմոբիլներով միջպետական ուղևորափոխադրումների անվտանգության մակարդակի բարձրացմանը և սպասարկման որակի բարելավմանը»,-նշել է Լ. Գրիգորյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -44-:
