Artsakhpress

Սփյուռք

«Դինքի հետ հանդիպման ժամանակ հետախուզության աշխատակիցներին ներկայացրել եմ որպես իմ ազգական». Ստամբուլի նախկին նահանգապետի օգնականի ցուցմունքը

Սեպտեմբերի 4-ին Ստամբուլի 14-րդ ծանր գործերով քրեական դատարանում կայացել է պոլսահայ լրագրող, «Ակօս» թերթի հիմնադիր և նախկին խմբագիր Հրանտ Դինքի սպանության գործով հերթական դատական նիստը:

«Դինքի հետ հանդիպման ժամանակ հետախուզության աշխատակիցներին ներկայացրել եմ որպես իմ ազգական». Ստամբուլի նախկին նահանգապետի օգնականի ցուցմունքը

«Դինքի հետ հանդիպման ժամանակ հետախուզության աշխատակիցներին ներկայացրել եմ որպես իմ ազգական». Ստամբուլի նախկին նահանգապետի օգնականի ցուցմունքը
ՍՏԵՓԱՆԱԿԵՐՏ, 5 սեպտեմբերի, ԱՐՑԱԽՊՐԵՍ:Նիստի ընթացքում վկայի կարգավիճակով ցուցմունք է տվել Ստամբուլի նախկին նահանգապետի օգնական Էրգուն Գյունգյորը, որը մանրամասներ է հաղորդել 2004թ. փետրվարի 24-ին Ստամբուլի նահանգապետարանում Հրանտ Դինքի հետ հանդիպումից, որը կայացել էր Թուրքիայի Ազգային հետախուզական կազմակերպության (ԱՀԿ) պահանջով, հայտնում է Tert.am:
«Թուրքիայի ԱՀԿ-ի շրջանային ղեկավարի օգնական Օզեր Յըլմազը և ԱՀԿ աշխատակից Հանդան Սելչուքը, ինձ մոտ գալով, ասացին, որ ցանկանում են հանդիպում տեղի ունենա Հրանտ Դինքի հետ: Ասացին, որ ցանկանում են, որ տեղի ունենա իմ սենյակում, քանի որ ես էի պատասխանատու անվտանգության և փոքրամասնությունների համար: Զանգահարեցի նահանգապետ Գյուլերին, որն իր համաձայնությունը տվեց, և հանդիպումը կայացավ: ԱՀԿ աշխատակիցների ներկայությամբ զանգահարեցի Դինքին և ասացի, որ ցանկանում եմ տեսնել իր հրապարակած նյութի տեղեկություններն ու փաստերը և զրուցել: Հաջորդ օրը հանդիպեցինք: ԱՀԿ-ականները ցանկացան, որ նրանց որպես իմ ազգական ներկայացնեմ, որպես ազգական ներկայացրի»,- պատմել է Էրգուն Գյունգյորը:
Ըստ նրա՝ հանդիպման ժամանակ ինքը և ԱՀԿ աշխատակից Օզերը զգուշացրել են Հրանտ Դինքին, որ Սաբիհա Գյոքչենի վերաբերյալ նյութը վրդովմունք կարող է առաջացնել և թիրախ դարձնել հայկական կազմակերպությունները (ըստ այդ նյութի՝ Թուրքիայում որպես Աթաթուրքի հոգեժառանգ և առաջին թուրք կին օդաչու Սաբիհա Գյոքչենը թուրքացված հայ է): Նա հավելել է, որ հանդիպման ավարտին Հրանտ Դինքը թողել է իր մոտ առկա փաստաթղթերը, որոնք վերցրել են ԱՀԿ աշխատակիցները: Ստամբուլի նախկին նահանգապետի օգնականը նշել է, որ դեպքի պատասխանատուն նախկին նահանգապետն է, և որ ինքը պարզապես «նահանգապետի ստորագրելու բեռն է թեթևացրել»:
Հիշեցնենք, որ դատական նիստեր են նախատեսված նաև սեպտեմբերի 5-ին և 6-ին: Նիստերին հետևում է Թուրքիայի խորհրդարանի հայ պատգամավոր Կարո Փայլանը:
Հրանտ Դինքը սպանվել է 2007թ.-ի հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է ավելի քան 10 տարի և դեռևս չի գտել իր հանգուցալուծումը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարինուղարկելով sms հաղորդագրություն՝ նշելով համապատասխան կոդը` -30-:

     

Քաղաքական

Տնտեսական

Ռազմական

Ամենադիտված

ամիս

շաբաթ

օր

Search