Շուշիի կերպարվեստի պետական թանգարանում նախօրեին տեղի է ունեցել լիբանանահայ սոպրանո Շողիկ Թորոսյանի մենահամերգը:
Շուշիում կայացել է լիբանանահայ երգչուհի Շողիկ Թորոսյանի մենահամերգը
ՍՏԵՓԱՆԱԿԵՐՏ, 14 օգոստոսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` մենահամերգին ներկայացվել է Կոմիտասի ստեղծագործություններից, հնչել է նաև հայ դասական երաժշտություն:
Շուշիի «Վարանդա» երիտասարդական երգչախմբի և երգչուհու կատարմամբ ներկայացվել է «Թալիշի դիրքերում» երգը, որի խոսքերի հեղինակը լրագրող, հրապարակախոս Միքայել Հաջիյանն է: Երգը նվիրված է Ապրիլյան պատերազմի մեր բոլոր նահատակներին:
Իր խոսքում Շուշիի «Վարանդա» երիտասարդական երգչախմբի գեղարվեստական ղեկավար և խմբավար Զաքար Քեշիշյանն ասել է, որ համերգն իր տեսակով յուրօրինակ է և կրում է խորհուրդ, քանի որ երգչուհին ոչ միայն կատարում է հայ մտքի գոհարներից, այլև Լիբանանում տարածում է հայկական երաժշտությունը:
Նրա խոսքով` Շ. Թորոսյանը Սփյուռքում շարունակում է իր ավանդն ունենալ` հայ պատանիներին ազգային երգը փոխանցելու առաքելությամբ:
Իր հերթին երգչուհին ասել է, որ ուրախ է Արցախում համերգային ծրագրով հանդես գալու համար:
«Այսօր ես գտնվում եմ հերոսների հողի վրա, և ինձ համար մեծ պատիվ է ելույթ ունենալ նման հանդիսատեսի առաջ: Շնորհակալություն եմ հայտնում բոլոր նրանց, ովքեր աջակցեցին համերգը կազմակերպելու գործում»,- նշել է Շ. Թորոսյանը:
ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյան էլ ասել է, որ սա լիբանանահայ երգչուհու հետ:
«Այսօր ծափահարություններով հանդիսատեսը իր հիացմունքը հայտնեց երգչուհուն, և, կարծում եմ, հաջորդ համերգը վայելելու հնարավորություն կունենա արցախյան երաժշտասեր հասարակության ավելի լայն շրջանակ: Կարևորում եմ նման ծրագրերի իրականացումը, քանի որ վերջին տարիներին բավականին ակտիվացել են մշակութային շփումները սփյուռքահայ տարբեր գաղթօջախների հետ»,- ավելացրել է Լ. Հովհաննիսյանը:
Մենահամերգին ներկա էին ԱՀ Ազգային ժողովի փոխնախագահ Վահրամ Բալայանը, պաշտոնատար այլ անձինք, հյուրեր:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -39-:
