2019թ.-ի հունվար-հունիսին Արցախում տնտեսական ակտիվության ցուցանիշը 2018թ.-ի հունվար-հունիսի համեմատ կազմել է 111.1 %:
Առաջին կիսամյակում Արցախում տնտեսական ակտիվության ցուցանիշը կազմել է 111.1 %.Մանուշ Մինասյանն ամփոփել է արդյունքները
ՍՏԵՓԱՆԱԿԵՐՏ, 13 օգոստոսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ օգոստոսի 13-ին կայացած մամուլի ասուլիսի ժամանակ ասել է ԱՀ Ազգային վիճակագրական ծառայության նախագահ Մանուշ Մինասյանը:
Նրա խոսքով՝ ընթացիկ տարվա հունվար-հունիսին Արցախի համախառն ներքին արդյունքը կազմել է 132.7մլրդ դրամ` 2018թ. հունվար-հունիսի 120.9մլրդ դրամի դիմաց: ՀՆԱ-ի հավելաճի տեմպը կազմել է 9.6 %, ինդեքս-դեֆլյատորը`100.1 %: 2019թ. հունվար-հունիսին մեկ շնչին ընկնող ՀՆԱ-ն, ընթացիկ գներով, կազմել է 897.4 հազ. դրամ, 1853.5 ԱՄՆ դոլար կամ 1640.3 Եվրո:
ՀՆԱ-ի արձանագրված 9.6 % հավելաճի շուրջ 6.3 տոկոսային կետն ապահովել է առևտուրը և ծառայությունները, 4.4 տոկոսային կետը՝ արդյունաբերությունը, ներառյալ էներգետիկան, 1.5 տոկոսային կետը` շինարարությունը:
Մ. Մինասյանը նշել է, որ 2019թ. հունվար-հունիսին Արցախում, փաստացի գներով, թողարկվել է 73.9մլրդ դրամի արդյունաբերական արտադրանք, իրացվել է 73.5մլրդ դրամի պատրաստի արտադրանք: 2018թ. հունվար-հունիսի նկատմամբ արդյունաբերական արտադրանքի ֆիզիկական ծավալի ինդեքսը կազմել է 130.9%, ընդ որում հանքագործական արդյունաբերության և բացահանքերի շահագործման ոլորտում՝ 97%, մշակող արդյունաբերությունում` 280 %, էլեկտրականության, գազի, գոլորշու և լավորակ օդի մատակարարման ոլորտում` 107.2 % և ջրամատակարարման, կոյուղու, թափոնների կառավարման և վերամշակման ոլորտում` 105.6 %:«ԱՀ արդյունաբերական արտադրանքի կառուցվածքն ըստ բաժինների հետևյալն է. հանքագործական արդյունաբերություն և բացահանքերի շահագործում` 44.1%, մշակող արդյունաբերություն` 34.7% էլեկտրականության, գազի, գոլորշու և լավորակ օդի մատակարարում` 20.7%, և ջրամատակարարում, կոյուղի, թափոնների կառավարում և վերամշակում՝ 0.5%: Նախորդ տարվա նույն ժամանակաշրջանի համեմատ 15.8 %-ով նվազել է հանքագործական արդյունաբերության և բացահանքերի շահագործման ոլորտի, 17.9 %-ով աճել մշակող արդյունաբերության տեսակարար կշիռը: Ստեփանակերտ քաղաքի արդյունաբերական կազմակերպությունների կողմից թողարկվել է ընդհանուր արդյունաբերական արտադրանքի 42.6 %-ը, իսկ շրջաններից ամենամեծ մասնաբաժինն ունի Մարտակերտի շրջանը` 45.6 %»,- մանրամասնել է Մ. Մինասյանը:
Մամուլի ասուլիսին ԱՀ Ազգային վիճակագրական ծառայության նախագահը պատասխանել է լրագրողների կողմից բարձրացված մի շարք հարցերի:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -29-:
