ԱՀ նախագահը ողջունել է Ամերիկայի հայկական համագումարի ամառային փորձառության ծրագրի իրականացումը, որի շրջանակներում ամեն տարի ամերիկահայ երիտասարդներ են այցելում Արցախ և Հայաստան:
Ծրագրի մասնակիցներն Արցախից ստացած վառ տպավորություններով կկիսվեն ամերիկաբնակների հետ. Արփի Վարդանյան
ՍՏԵՓԱՆԱԿԵՐՏ, 12 հուլիսի, ԱՐՑԱԽՊՐԵՍ: Արցախի Հանրապետության Նախագահ Բակո Սահակյանի հետ հանդիպումից հետո այս մասին «Արցախպրես»-ի թղթակցի հետ զրույցում ասել է Ամերիկայի հայկական համագումարի տարածաշրջանային տնօրեն Արփի Վարդանյանը:
Նա նշել է, որ ուսանողները, ըստ իրենց մասնագիտության, ԱՀ-ում և ՀՀ-ում աշխատանքի են ընդունվում՝ ձեռք բերելով աշխատանքային փորձ:
Ըստ Ա. Վարդանյանի՝ իրենք նախագահի հետ քննարկել են նաև մի շարք ծրագրեր, որոնք իրականացվում են Արցախում:
«Այցի ընթացքում մենք եղել ենք պատմամշակութային տարբեր վայրերում, որպեսզի երիտասարդները մոտիկից ծանոթանան հայրենիքի հետ: Այցի ընթացքում տարբեր գերատեսչությունների ղեկավարների հետ կազմակերպում ենք նաև հանդիպումներ, քննարկում ոլորտին վերաբերող հարցեր: Ծրագրի մասնակիցներն Արցախից ստացած վառ տպավորություններով, հիշողություններով կկիսվեն ամերիկաբնակների հետ և ցույց կտան իրենց այցելություններից լուսանկարներ»,-մասնավորապես ասել է Ա. Վարդանյանը:
Ծրագրի մասնակից Միշել Օհանյանն էլ ասել է, որ ինքն առաջին անգամ է այցելում Արցախ:
Նա ուրախ ու երջանիկ է, որ մարդիկ Արցխում ապրում են անվտանգ:
Մինչ Արցախ գալը Միշելը լսել էր ԱՀ-ն մասին, գիտեր որ հակամարտող երկիր է, բայց չգիտեր, որ այս հրաշալի վայրում ապրում են բարի, ժպտերես, աշխատասեր մարդիկ:
