Շուշիում կայացել է Արցախի թեմի վերակազմավորման 30-ամյակին նվիրված համերգ (լուսանկարներ)
«Ծագումով Հայեր» նախագծի նախաձեռնությամբ և ԱՀ մշակույթի, երիտասարդության հարցերի և զբոսաշրջության նախարարության աջակցությամբ Շուշիի մշակույթի և երիտասարդության կենտրոնում տեղի է ունեցել Հայ առաքելական եկեղեցու Արցախի թեմի վերակազմավորման 30-ամյակին նվիրված համերգ:
Շուշիում կայացել է Արցախի թեմի վերակազմավորման 30-ամյակին նվիրված համերգ (լուսանկարներ)
ՍՏԵՓԱՆԱԿԵՐՏ, 29 հունիսի,ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառման մասնակիցներին Արցախի պարի պետական համույթը Շուշիի մշակույթի և երիտասարդության կենտրոնի բակում դիմավորել է հայկական պարերի շարանով:
Միջոցառմանը բացման խոսքով հանդես է եկել Հայ առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը:
Նա իր ելույթում մասնավորապես ասել է. «Ուրախ եմ, որ այսպիսի գեղեցիկ համերգով սկսել ենք տոնակատարել մեր պատմական թեմի վերաբացման 30-ամյակը:Արցախյան շարժումից անմիջապես հետո՝ 1989 թվականի սկզբին բացվեց Արցախի պատմական թեմը, տոնեցինք հաղթանակ, կերտեցինք պետականաշինություն և այժմ էլ շարունակում ենք զարգացնել գիտական, մշակութային, սպորտային կյանքը: Այս ամենը մենք իրականացրել ենք համահայկական ջանքերով, արյունով, կամքով, նվիրումով, որովհետև ունեցել ենք սեր դեպի հայրենիքը: Թող Աստված անսասան պահի մեր հայրենիքը, բանակը, հավատը, մեր ազգային ավանդական արժեքները, իսկ մեզ պարգևի համազգային միասնություն, սեր և համերաշխություն՝ շարունակելու մեր նվիրական ու ազատագրական ճանապարհը»:
ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանն էլ իր խոսքում ասել է, որ Արցախ աշխարհի համար օրն առանձնահատուկ է, քանի որ մեկնարկել է Հայ առաքելական եկեղեցու Արցախի թեմի վերակազմավորման 30-ամյակին նվիրված միջոցառումների շարքը:
«Հայ առաքելական եկեղեցին իր մեջ ներառելով հայ ժողովրդի ոգու արիությունը միավորում է մեզ բոլորիս: Պատահական չէ, որ աշխարհի տարբեր վայրերում ապրող մեր հայրենակիցներն այցելել են Արցախ. նրանք միավորում են հոգևոր, մշակութային արժեքները, որոնցով մենք կարողանում ենք հպարտորեն ներկայանալ աշխարհին: Ովքեր որ առաջին անգամ են Արցախում, համոզված եմ, որ սիրել են մեր երկիրը»,-ավելացրել է Լ. Հովհաննիսյանը:
Հայապահպանության գործում ունեցած ավանդի համար ԱՀ մշակույթի, երիտասարդության հարցերի և զբոսաշրջության նախարարության անունից Լ. Հովհաննիսյանը մի շարք անձանց հանձնել է պատվոգրեր:
«Ծագումով Հայեր» նախագծի հեղինակ և հաղորդվար Մանանա Հակոբյանն իր խոսքում ասել է. «Յուրաքանչյուր հայ աշխարհի որ ծայրում էլ գտնվի, պետք է գիտակցի, որ սրբությունը, մեր ամրակուռ բերդն ու մեր պատմության հավերժ վկան Արցախ աշխարհն է: Առանց հզոր ու ապահով աշխարհի, մենք չենք ունենա ապահով Հայաստան: Այդ գիտակցությամբ էլ հավաքվել ենք Արցախում նշելու Հայ առաքելական եկեղեցու Արցախի թեմի վերակազմավորման 30-ամյակը»:
Նա շնորհակալություն է հայտնել այն անձանց, որոնց անմիջական մասնակցությամբ կյանքի է կոչվել միջոցառումը:
Մ. Հակոբյանը պատվոգրեր է հանձնել «Ծագումով Հայեր» նախագծի ստեղծագործական կազմի անդամներին և երախտագիտության խոսքեր հղել նրանց կատարած նվիրական գործի համար:
Համերգային երեկոյի հատուկ հյուրն էր ֆրանսահայ նշանավոր երգիչ Պատրիկ Ֆիորին(Պատրիկ Ժան-Ֆրանսուա Շուշայան), ով վերջին անգամ Արցախ էր այցելել չորս տարի առաջ:
Համերգին հանդես են եկել նաև Արցախի պետական ջազ նվագախումբը, ՀՀ վաստակավոր արտիստ, օպերային երգիչ Պերճ Քարազյանը և այլք: Արցախի մասին ցուցադրվել է նաև տեսահոլովակներ:
Միջոցառմանը ներկա էին ԱՀ նախագահ Բակո Սահակյանը՝ տիկնոջ Անահիտ Սահակյանի հետ, ԱՀ Ազգային ժողովի նախագահ Աշոտ Ղուլյանը, պետական այրեր, «Ծագումով Հայեր» նախագծի անդամներ և այլք: