Ստեփանակերտում կայացել է «Ես կառուցում եմ իմ հողի վրա» գրքի շնորհանդեսը
Արցախի ժուռնալիստների միության գրասենյակում այսօր՝ հունիսի 18-ին, տեղի է ունեցել լրագրող, ԱՀ գրողների միության անդամ, ԱԺ պատգամավոր Վարդգես Բաղրյանի «Ես կառուցում եմ իմ հողի վրա» գրքի շնորհանդեսը՝ նվիրված Ղարաբաղյան շարժման առաջամարտիկ, Հովսեփավան բնակավայրի հիմնադիր՝ Յուրի Ջհանգիրյանին:
Ստեփանակերտում կայացել է «Ես կառուցում եմ իմ հողի վրա» գրքի շնորհանդեսը
ՍՏԵՓԱՆԱԿԵՐՏ, 18 հունիսի,ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Արցախի ժուռնալիստների միության նախագահ, գրող Կիմ Գաբրիելյանը: Նա, ողջունելով ներկաներին, շնորհավորել է հեղինակին հերթական հայրենասիրական նախաձեռնության՝ գրքի լույսընծայման կապակցությամբ:
««Ես կառուցում եմ իմ հողի վրա» գրքում զետեղված են բավականին հետաքրքիր դրվագներ, որոնցից որոշ չափով տեղյակ էի և նորից հնարավորություն ունեցա վերհիշելու: Ինձ համար լեգենդ էր Յուրի Ջհանգիրյանը, բայց անձամբ չէի ճանաչում նրան: Իրական հերոսություն էր նրա կողմից կառուցել գյուղ՝ Խոջալուի մոտ, որտեղ հաստատվել էր թուրքական օմոնը, և ժողովրդին ահաբեկում էին ռուսական զինվորները: Մենք պետք է մեր սերնդին դաստիարակենք այդպիսի մարդկանց հերոսական արարքներով: Ճանաչելով նրանց՝ նոր սերունդը կկարողանա պատկերացում կազմել Ղարաբաղյան շարժման մասին: Երբ գրական գործն է դառնում պատմության վավերագրության նմուշ, այն ավելի մեծ ազդեցություն է ունենում, քան զուտ տեղեկատվությունը: Հուսով եմ բոլոր ժամանակների սերունդներն էլ կանդրադառնան նման հերոսական փաստագրությունների»,-մասնավորապես ասել է Կ.Գաբրիելյանը:
Գրքի հեղինակ Վարդգես Բաղրյանն էլ շնորհակալություն է հայտնել ներկաներին՝ հնչեցրած կարծիքների համար և նշել, որ գրքի համահեղինակ է նաև Յուրի Ջհանգիրյանի դուստր Էլմիրա Ջհանգիրյանը: Բաղրյանը նշել է, որ մինչև Ղարաբաղյան շարժումն ինքն արդեն ծանոթ էր Յուրի Ջհանգիրյանի հետ:
«Այն հսկայական գործը, որն արել է Յուրի Ջհանգիրյանը՝ պարզապես անգնահատելի է: Այդպիսի ժամանակաշրջանում նրա կողմից կառուցված և այժմ էլ շենացող Հովսեփավանն այսօր Արցախի լինելիության վկայությունն է: Համոզված եմ, որ ժամանակի ընթացքում Ջհանգիրյանի և նրա նման հերոսների գործն էլ ավելի է արժևորվելու: Պիտի խոստովանեմ, որ ինձ համար շատ դժվար էր աշխատել նման հուզիչ գրքի վրա, քանի որ նրա ընտանիքը շատ ողբերգական ճակատագիր է ունեցել, բայց նույնիսկ այդ ողբերգականության մեջ հերոսություն կար: Մեր՝ գրողներիս պարտքն է Յուրի Ջհանգիրյանի նման արժանավոր մարդկանց մասին գրելը ու նրանց կատարած աշխատանքը կրկին անգամ արժևորելը»,-մասնավորապես ասել է նա:
Շնորհանդեսին ներկա Յուրի Ջհանգիրյանի դուստր Էլմիրա Ջհանգիրրյանն էլ շնորհակալություն է հայտնել ներկաներին՝ իր հոր հիշատակը վառ պահելու, կատարած աշխատանքը գնահատելու և նման վերաբերմունքի արժանացնելու համար:
Միջոցառմանը ելույթներով հանդես են եկել ԱՀ գրողների միության անդամներ, Յուրի Ջհանգիրյանի հարազատներ և ընկերներ: