ՍՏԵՓԱՆԱԿԵՐՏ, 22 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ մայիսի 22-ին, Խորհրդարանում կայացած ԱԺ արտադրության և արտադրական ենթակառուցվածքների հարցերի ու ֆինանսաբյուջետային կառավարման հարցերի մշտական հանձնաժողովների համատեղ նիստին ասել է ԱՀ քաղաքաշինության նախարար Կարեն Շահրամանյանը՝ մանրամասնելով, որ նշված գումարից միայն տարբեր հարկատեսակներով պետական բյուջե է վերադարձվել 3 միլիարդ 593 միլիոն դրամ:

Նախարարի խոսքով՝ ԱՀ պետական բյուջեով 2018 թ.-ին կապիտալ ներդրումների պետական պատվերի ծրագրի համար ի սկզբանե նախատեսվել է 13 միլիարդ 930 միլիոն դրամ, որը դեկտեմբերի 30-ի դրությամբ կազմել է 19 միլիարդ 540 միլիոն դրամ կամ լրացուցիչ ֆինանսավորվել է 5 միլիարդ 610 միլիոն դրամ: Լրացուցիչ ֆինանսավորումը իրականացվել է  պետական բյուջեի տարբեր հոդվածներում կատարված փոփոխությունների հաշվին: Բացի նշվածից, ԱՀ կառավարության պահուստային ֆոնդից հատկացվել է կապիտալ շինարարության համար ևս 878 միլիոն դրամ, գույքի գնման ծախսերով՝ 109 միլիոն դրամ և քաղաքացիական պաշտպանության միջոցառումների ծրագրով՝ 79.5 միլիոն դրամ:

Շինարարության ոլորտի բաժնեմասը երկրի տնտեսության համախառն ներքին արդյունքում կազմում է շուրջ 6.8 տոկոսը, իսկ պետական բյուջեի մոտ 20 %-ը: Նշված ծավալի աշխատանքները իրականացվել են 283 կազմակերպությունների կողմից, որոնցից 195-ը՝ շինարարական, 50-ը՝ նախագծային և 38-ը շինանյութեր և գույք մատակարարող կազմակերպություններ են: