Ինչպես են դեռ մեկ տարի առաջ խոսում, թե Արցախում սպասվող նախագահական ընտրություններում ում շանսերն են ավելի շատ կամ քիչ, ժողովրդի ընտրությունից հետո միայն պատկերը պարզ կլինի:
Քաղաքացիության վերաբերյալ Ս. Բաբայանի համեմատությունները կաղում են, ժողովրդի ընտրությունից հետո պարզ կլինի՝ ում շանսերն են մեծ. Վարդգես Բաղրյան
ՍՏԵՓԱՆԱԿԵՐՏ, 28 ապրիլի, ԱՐՑԱԽՊՐԵՍ: Այս մասին Tert.am-հետ զրույցում ասել է Արցախի խորհրդարանի «Ժողովրդավարություն» խմբակցության ղեկավար Վարդգես Բաղրյանը՝ անդրադառնալով ԱՀ ՊԲ նախկին հրամանատար, Արցախի հերոս Սամվել Բաբայանի հայտարարությանը, թե Արցախի իշխանությունները խոչընդոտում են իր մասնակցությանն ընտրություններին, քանի որ գիտեն՝ մասնակցության դեպքում կարող է հաջողություն ունենալ, լուրջ մրցակցություն կլինի:
«Խեղաթյուրված են այն պնդումները, թե իբր ԼՂՀ իշխանություններն են ասում, որ Սամվել Բաբայանը կամ որևէ մեկն իրավունք չունի առաջադրվելու, դա օրենքն է ասում, Սահմանադրությունն է ասում: Հիմա կա Սահմանադրության որոշ դրույթների փոփոխության հնարավորություն, որքանով է իրատեսական դա, ընթացքը ցույց կտա»,-մանրամասնել է նա:
Դիտարկմանը, թե Սամվել Բաբայանն ընդգծում է, որ 2007-ին քաղաքացիության խնդիր ունեցել է նաև Արցախի նախագահ Բակո Սահակյանը, և դա խնդիր չի դիտարկվել, Վարդգես Բաղրյանն արձագանքել է, որ Սամվել Բաբայանի համեմատությունները կաղում են:
«Ես գիտեմ, որ Բակո Սահակյանը գործուղված էր Մոսկվա, և այնպես չէ, որ գրանցումից դուրս էր եկել, ինչպես Սամվել Բաբայանի դեպքում էր: Բակո Սահակյանն ուներ առաջադրվելու իրավունք»,-ընդգծել է նա:
Հարցին, թե «Ժողովրդավարական» կուսակցությունն ինչ ծրագրեր է պատրաստվում ներկայացնել, քանի որ նախընտրական մրցավազքն Արցախում արդեն կարելի է համարել մեկնարկած, որոշ թեկնածուներ գրասենյակներ են բացել, ծրագրեր են ներկայացնում, պատգամավորը պատասխանել է.
«Վերապահումներով կարելի է ասել, որ Արցախում նախընտրական մրցավազքը սկսել է, բայց ծրագրերի մասին խոսելը դեռ շատ վաղ է: Գրասենյակներ նույնպես որոշ թեկնածուներ բացել են, հանդիպումներ են ունենում: Բայց միայն գրանցվելուց հետո պաշտոնապես թեկնածուն կարող է քարոզարշավ սկսել»:
Վարդգես Բաղրյանն ասել է նաև, որ մասնակցության իրենց ձևաչափը պարզ կլինի համագումարից հետ:
«Առիթ ունեցել եմ ասելու, որ մասնակցելու ենք խորհրդարանական, նախագահական և ՏԻՄ ընտրություններին, ասել եմ, որ չի բացառվում, որ մեր կուսակցության նախագահի թեկնածուն կարող է լինել Աշոտ Ղուլյանը, բայց վերջնական պարզ կլինի համագումարից հետո»,-ընդգծել է նա:
Անդրադառնալով մամուլում շրջանառվող տեղեկություններին, թե 2020 թ. սպասող ընտրությունների զարգացումների թիկունքում ՀՀ նախկին իշխանավորներն են կանգնած, օրինակ՝ Վիտալի Բալասանյանը, ով համարվում է 2-րդ նախագահ Ռոբերտ Քոչարյանի թիմի թեկնածու, ԱՀ պատգամավորն ասել է.
«Այսպիսի խոսակցությունները, գուցե, ենթադրություններ են, ես էլ կարդացել եմ, ո՛չ կարող եմ հերքել, ո՛չ էլ հաստատել, երբեմն այնպիսի բաներ եմ կարդում,որ զարմանք են առաջացնում, բայց ինչ ասեմ, ամեն ինչ հնարավոր է, ինչպե՞ս ասեմ՝ Ռոբերտ Քոչարյանը սատարում է, թե ոչ, ես էլ եմ լսել նման խոսակցություններ»:
Հիշեցնենք, որ այս պահին Արցախի նախագահի ընտրություններում որպես նախագահի թեկնածու շրջանառվում են Արցախի հերոս Սամվել Բաբայանի, ԱՀ Ազգային անվտանգության խորհրդի քարտուղար Վիտալի Բալասանյանի, ԱՀ նախկին վարչապետ Արայիկ Հարությունյանի, ԱՀ ԱԺ նախագահ Աշոտ Ղուլյանի անունները: Գործող նախագահ Բակո Սահակյանը հայտարարել էր, որ չի մասնակցելու 2020-ին կայանալիք ընտրություններին:
