2018 թ.-ի ընթացքում ԱՀ Մարդու իրավունքների պաշտպանի և աշխատակազմի աշխատակիցների այցերը հարկադիր պահման վայրեր կրել են պարբերական բնույթ:
ՄԻՊ-ը խնդիրներ է արձանագրել քրեակատարողական վարչությունում և մշտադիտարկման կենթարկի հարկադիր պահման վայրերում մարդու իրավունքների պաշտպանվածությունը
ՍՏԵՓԱՆԱԿԵՐՏ, 25 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր՝ ապրիլի 25-ին կայացած մամուլի ասուլիսի ժամանակ ասել է ԱՀ Մարդու իրավունքների պաշտպան Արտակ Բեգլարյանը և ավելացրել, որ ազատությունից զրկված անձանց իրավունքների ապահովումը իրականացվել է ինչպես անհատական դիմումների կապակցությամբ քննարկման ընթացակարգ նախաձեռնելու, այնպես էլ ազատությունից զրկված անձանց պահման պայմանները դիտարկելու, վերջիններիս և հաստատության աշխատակիցների հետ առանձնազրույցներ ունենալու ընթացքում անմիջականորեն ընկալված փաստերին պատշաճ արձագանքելու միջոցով:
«2018թ.-ի ընթացքում ԱՀ ոստիկանության քրեակատարողական վարչությունում գտնվող անձանցից ստացված դիմումներն առնչվել են ազատությունից զրկված անձանց բուժօգնության տրամադրման, ազգականների հետ տեսակցության կազմակերպման, այլ քրեակատարողական հիմնարկներ տեղափոխման, ինչպես նաև վաղաժամկետ ազատման հետ կապված հարցերին: Հաշվետու տարում Աշխատակազմ է մուտքագրվել վատ վերաբերմունքի և դատապարտյալի ինքնավնասման վերաբերյալ մեկական դիմում: Բարձրացված հարցերի մի մասն աշխատանքային կարգով քննարկվել է քրեակատարողական վարչության ղեկավարության հետ և լուծում ստացել: Պետք է նշել, որ քրեակատարողական վարչությունում արձանագրվել է գերբնակեցման և ազատազրկված անձանց խցերում անհավասարաչափ բաշխման, ինչպես նաև դատապարտյալների, ձերբակալված և կալանավորված անձանց տեսանելիության և խցերի լուսավորվածության սահմանափակման դեպքեր»,- մանրամասնել է Ա. Բեգլարյանը:
Պաշտպանը շեշտադրում է, որ քննչական մեկուսարանում ձերբակալված և կալանավորված անձանց՝ քննիչների ու պաշտպանների հետ հանդիպումները պետք է կազմակերպվեն առանց տեխնիկական խոչընդոտների: Բացի դրանից, պաշտպանների հետ տեսակցությունը տվյալ սենյակում տեղի է ունենում դուռը բաց վիճակում, որը չի համապատասխանում բնագավառը կարգավորող ակտերի պահանջներին:
«Ողջունելով քրեակատարողական հիմնարկում հեռախոսային կապի առկայությունը, արձանագրում ենք նաև, որ քննչական մեկուսարանում նման հնարավորությունը բացակայում է, ինչպես նաև ոլորտի պատասխանատուների ուշադրությունն ենք հրավիրում ազատազրկված անձանց՝ արտաքին աշխարհի հետ հաղորդակցվելու, այդ թվում՝ նամակագրություն վարելու, տեսակցություններ ունենալու, հեռախոսակապից օգտվելու, գրականությունից, հնարավոր լրատվամիջոցներից օգտվելու և Պաշտպանին դիմելու իրավունքների իրացման վրա: Ազատությունից զրկված անձանց՝ արտաքին աշխարհի հետ հաղորդակցվելու իրավունքի իրացման հետ կապված խնդիրների մի մասն առընչվում է տեսակցությունների տրամադրման ընթացակարգերի, ինչպես նաև տեսակցությունների համար նախատեսված սենյակների ու դրանց պայմանների հետ: Մասնավորապես, հիմնական խնդիրներից են տեսակցության համար նախատեսված սենյակների զբաղվածությունը և տեսակցության սենյակում միջնապակու առկայությունը։ Կարևորելով ազատազրկված անձանց ուղղման համար մեծ նշանակություն ունեցող, ընտանիքի անդամների հետ անմիջական՝ առանց արհեստական խոչընդոտների շփման դերը՝ առաջարկում ենք ազատազրկված անձանց անմիջական շփման հնարավորություն ընձեռել մերձավոր ազգականների հետ: Վերը նշված իրավունքների պատշաճ ապահովումն ու իրացումը բխում են Արցախի Հանրապետության կողմից ընդունված միջազգային պայմանագրերից (Մարդու իրավունքների համընդհանուր հռչակագիր, Մարդու իրավունքների և հիմնարար ազատությունների պաշտպանության մասին կոնվենցիա) և ԱՀ Սահմանադրությունից»,- ավելացրել է Ա. Բեգլարյանը:
Նա նշել է նաև, որ անհրաժեշտ է խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի կամ պատժի դեմ ՄԱԿ-ի կոնվենցիան Արցախի Հանրապետության կողմից ընդունել, քանի որ այն հնարավորություն կտա պետությանը բարեփոխել համակարգը միջազգային խրախուսելի չափանիշներին համապատասխան, իսկ Պաշտպանին հնարավորություն կտա առավել համապարփակ գործունեություն իրականացնել այս ոլորտում:
Ա. Բեգլարյանի խոսքով՝ առաջիկայում նախատեսվում է մոնիթորինգային այցերի միջոցով ուսումնասիրել նաև ԱՀ առողջապահության նախարարության հոգեթմրաբանական դիսպանսերում պահվող անձանց իրավունքների պաշտպանվածության վիճակը, ոլորտում առկա խնդիրները՝ հանդես գալով վերհանված խնդիրները կարգավորելուն ուղղված համապատասխան առաջարկներով ու նախաձեռնություններով:
