ՍՏԵՓԱՆԱԿԵՐՏ, 24 ապրիլի, ԱՐՑԱԽՊՐԵՍ: «Արցախպրես»-ի  թղթակցի  հաղորդմամբ՝ «Զանգակատուն» հուշակոթող  են  այցելել  նաև  ԱՀ  նախագահ   Բակո  Սահակյանը, ԱՀ  Ազգային  ժողովի  նախագահ  Աշոտ  Ղուլյանը, ԱՀ  պետնախարար  Գրիգորի  Մարտիրոսյանը,  պետական   այրեր, հյուրեր  և  այլք:

Նրանք  ծաղիկներ  և   ծաղկեպսակ  են   խոնարհել  1915  թվականին   իրականացված   ոճրագործության անմեղ զոհերի  հիշատակին:

Որից  հետո  Արցախի  թեմի   առաջնորդ  Պարգև  Արքեպիսկոպոս  Մարտիրոսյանի  հանդիսապետությամբ   և    հոգևոր  դասի   մասնակցությամբ  հուշակոթողի  մոտ   կատարվել է  սուրբ  նահատակների  ոգեկոչման  կարգ:

Արցախի  թեմի առաջնորդն   իր  խոսքում  ասել է,  որ   1988  թվականին, երբ  ոտքի   ելավ   հայ  ժողովուրդը, ստեղծեց  Հայոց  կանոնավար  բանակ, իսկապես  կասեցվեց   նոր  ցեղասպանությունները, որի  փորձերն  արվել  են  Բաքվում, Սումգայիթում, Մինգիչավուրում, Մարաղայում, Թալիշում  և  այլուր:

«Ուժով  է  պետք   պաշտպանել  կյանքը,  զենքով  է   պետք   պաշտպանել  հայրենիքն  ու  հավատքը, պատիվը, ազատությունն  ու  ինքնությունը: Մենք  ապրում  ենք  անտարբեր մարդկանց  մեջ, որոնք,իրենց սեփական  շահերից  ելնելով,  ոտնակոխ  են  անում  բարոյականը, ազնիվն  ու  արդարը, որի  համար  պայքարում  է  արցախցին: Ունենալով դառը  փորձ՝ այսօր   այստեղ  ենք  խնկարկելու նրանց  հիշատակը: Այստեղ  ենք նաև, որպես պահանջատեր:    Աշխարհը  պետք  է  դատապարտի   Հայոց  Ցեղասպանությունը, որի  համար  մենք  պետք  է   շարունակենք  պայքարել»,-մասնավորապես  ասել է   Արցախի  թեմի   առաջնորդը:

«Զանգակատուն»  հուշակոթողի ճարտարապետ Վլադիմիր  Սարգսյանը, ով  ևս  եկել  էր  իր  հարգանքի  տուրքը   մատուցելու  անմեղ  զոհերի  հիշատակին, մեզ  հետ  զրույցում  ասել է, որ  նման  հուշակոթողի    կառուցման  գաղափարն  առաջացել է  Պարույր  Սևակի  «Անլռելի  Զանգակատուն»  պոեմի  ներշնչանքից:

«Առաջարկվել   են  տարբեր   էսքիզային  նախագծեր, որոնց  արդյունքում  ընտրվել  է   հենց  այս   հուշակոթողի  տարբերակը: Այն   ունի  16  մ բարձրություն: Հուշակոթողի   վերևում  տեղադրված  է   2,5  մ  բարձրությամբ   խաչ: Զանգակատան  հիմքում կան Դեր Զորից բերված մասունքներ, որոնք   ապակեպատ  են: Երբ միջազգային  հանրություննը  վերջնական  կընդունի 1915  թվականին   հայերի   նկատմամբ   կատարված  պատմական  իրողությունը, այդ  ժամանակ   ապակին  կհանվի  և այդ  մասունքները  հողին  կհաձնվեն»,-նշել է  ճարտարապետը՝  հավելելով, որ  այն   կառուցվել  է  2015  թվականին՝  ի  հիշատակ  Հայոց  ցեղասպանության  100-րդ  տարելիցին:

Սգո  արարողությանը մի  խումբ   երիտասարդներ  հանդես են եկել պաստառներով, որոնցով  դատապարտել են Հայոց ցեղասպանությունը և կոչ  արել աշխարհին՝  ճանաչել  Մեծ  եղեռնը:

Նշենք, որ  Հայոց  ցեղասպանության  104-րդ  տարելիցին  նվիրված՝  միջոցառումներ  են կազմակերպվել  նաև  Արցախի  բոլոր   շրջաններում: