Երևանի շախմատի ակադեմիայում ընթանում է շախմատի ՀՀ պատանիների և աղջիկների 2019 թվականի առաջնության եզրափակիչ փուլը:
Արցախցի դպրոցականները մասնակցում են շախմատի ՀՀ պատանիների և աղջիկների առաջնության եզրափակիչ փուլին
ՍՏԵՓԱՆԱԿԵՐՏ, 22 ապրիլի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Ստեփանակերտի շախմատի հանրապետական դպրոցի փոխտնօրեն Վիլեն Ավագյանն ասել է, որ առաջնության եզրափակիչ փուլում Արցախից մասնակցում են Մարտակերտի շրջանի Հաթերք գյուղից Ալեքս Մանուկյանը և Ստեփանկերտից՝ Մանե Ադամյանը:
Ըստ Վ. Ավագյանի՝ երեխաները լավ պատրաստված են խաղին: Նրանք մի քանի տարի անընդմեջ մասնակցել են շախմատի առաջնությունների և գրավել մրցանակային տեղեր:
«Վերջին տարիներին մեր հանրապետությունում մեծ ուշադրություն է դարձվում շախմատի զարգացմանը: Շախմատը զարգացնում է ոչ միայն երեխաների, այլև տարեցների մտավոր կարողությունները: Այն հնարավորություն է տալիս նաև երեխային ինքնուրույն որոշումներ կայացնելու, գնահատելու իրավիճակը և գտնելու ստեղծված դրությունից դուրս գալու լավագույն լուծումը: Ստեփանակերտի հանրապետական շախմատի դպրոցում մենք ավելի խորը գիտելիքներ են տալիս երեխաներին, և նրանց ունեցած հմտությունները բարձր հիմքերի վրա ենք պահում: Դպրոցում շախմատի դերը բարձրացնելու, երեխաների մոտ շախմատի նկատմամբ հետաքրքրություն առաջացնելու համար մենք ամեն տարի կազմակերպում ենք դպրոցականների շախմատի օլիմպիադա»,-ավելացրել է Վ. Ավագյանը:
