Ընթացիկ տարվա հունվար ամսվա ընթացքում Արցախի Հանրապետության տարածք են ներմուծվել 7.5 մլրդ դրամ գումարի չափով ապրանքանյութական արժեքներ, որը 2.2 մլրդ դրամով կամ 42.7 %-ով գերազանցել է նախորդ տարվա նույն ցուցանիշը:
Արցախ ներմուծված ապրանքների ծավալը հունվար ամսվա ընթացքում աճել է 42.7%-ով
ՍՏԵՓԱՆԱԿԵՐՏ, 18 փետրվարի, ԱՐՑԱԽՊՐԵՍ: Այս մասին «Արցախպրես»-ին տեղեկացրին ԱՀ ֆինանսների նախարարությունից՝ մանրամասնելով, որ ներմուծման ծավալների աճ արձանագրվել է հիմնականում գյուղատնտեսական ապրանքների, բժշկական տեխնիկայի, վառելիքի և արդյունաբերական ապրանքների հաշվին:
Աղբյուրի հաղորդմամբ՝ նույն ժամանակահատվածում արտահանվել են 7.3 մլրդ դրամ գումարի չափով ապրանքանյութական արժեքներ` նախորդ տարվա նույն ժամանակահատվածի 9.3 մլրդ դրամի դիմաց կամ պակաս 20.8 %-ով, ինչը պայմանավորված է հանքագործական արտադրանքի արտահանման ծավալների նվազմամբ:
Հարկ է նշել, որ Վարդենիս-Մարտակերտ և Գորիս-Ստեփանակերտ ճանապարհահատվածներին տեղակայված հսկիչ կետերում արձանագրված տվյալների համաձայն՝ Վարդենիս-Մարտակերտ ճանապարհահատվածով ներմուծվել և արտահանվել են համապատասխանաբար 3.8 մլրդ դրամ և 6.6 մլրդ դրամ գումարի չափով ապրանքանյութական արժեքներ, իսկ Գորիս-Ստեփանակերտ ճանապարհահատվածով` համապատասխանաբար 3.7 մլրդ դրամ և 0.7 մլրդ դրամ գումարի չափով:
