Արցախի Հանրապետության Նախագահ Բակո Սահակյանը հունվարի 23-ին ընդունել է Հայ Յեղափոխական Դաշնակցության (ՀՅԴ) 33-րդ Ընդհանուր ժողովի մասնակիցներին:
ԱՀ նախագահի և Ընդհանուր ժողովականների կողմից մատնանշվել են այն կարևոր խնդիրները, որոնք ծառացած են հայ ժողովրդի առաջ. Դավիթ Իշխանյան
ՍՏԵՓԱՆԱԿԵՐՏ, 23 հունվարի, ԱՐՑԱԽՊՐԵՍ: Հանդիպումից հետո «Արցախպրես»-ի թղթակցի հետ զրույցում ՀՅԴ Կենտրոնական կոմիտեի ներկայացուցիչ, ԱՀ Ազգային ժողովի «Դաշնակցություն» խմբակցության պատգամավոր Դավիթ Իշխանյանն ասել է, որ հանդիպմանն ԱՀ նախագահի և Ընդհանուր ժողովականների կողմից մատնանշվել են այն մարտահրավերները և կարևոր խնդիրները, որոնք ծառացած են հայ ժողովրդի առաջ, և որոնք առաջիկա տարիներին պետք է իրականացնի Դաշնակցությունը:
«Որպես պատմական փաստ՝ պետք է արձանագրեմ, որ Հայ Յեղափոխական Դաշնակցության պատմության մեջ առաջին անգամ է, որ Ընդհանուր ժողովն անց է կացվում Արցախում. դրա մեջ մեծ խորհուրդ կա: Կարևոր է այն հանգամանքը, որ հայ ժողովրդի առաջ ծառացած հիմնախնդիրների լուծման առումով Արցախն ունի իր տեղն ու դերը: Չպետք է մոռանանք, որ վերջին 30 տարիների ընթացքում համահայկական իրականության մեջ Արցախի հիմնախնդրը եղել է ամենակարևոր հարցը: Արցախում այս ժողովի անցկացումն նպատակ ունի մեկ անգամ ևս արժևորելու այն մտահոգությունները, որոնք առաջացել են վերջին շրջանում, և որոնց լուծման համար պետք է գտնել ճիշտ ուղիներ»-ավելացրել է:
